Deepak Kesarkar : एकनाथ शिंदेंच्या लाडक्या 'दीपकला' विधान परिषद, राज्यसभेचे वेध; राजकीय निवृत्तीवरून यु-टर्न

Deepak Kesarkar : काहीच दिवसांपूर्वी आजारपणातून बरे झाल्यानंतर शिवसेना आमदार दीपक केसरकर यांनी आपण राजकीय निवृत्ती घेणार असल्याची घोषणा केली होते. मात्र "ते वक्तव्य मी गमतीने केले होते," असे म्हणत या घोषणेवरून त्यांनी युटर्न घेतला आहे. आगामी काळात राज्यसभा किंवा विधान परिषदेची निवडणूक लढवण्याची क्षमता आपली आहे, असेही त्यांनी स्पष्ट केले.

मागील काही दिवसांपासून दीपक केसरकर मुख्य राजकीय प्रवाहापासून दूर आहेत. फडणवीस सरकारमध्ये मंत्रिपद न मिळाल्याने ते नाराज असल्याचे सांगितले जात होते. पण "मी नाराज नाही, मागील अडीच वर्ष मी मंत्रिपदी होतो. त्यात मी खुश आहे. मला काम करण्यासाठी आमदारकीही पुरेशी आहे. इतरांनाही संधी मिळायला हवी. आता माझं वय वाढतं आहे. त्यामुळे आगामी काळात कुणीतरी उठून बाजूला व्हा म्हण्यापेक्षा आपणच आधीच बाजूला झालेलं चांगलं", अशी प्रतिक्रिया दिली होती.

त्यानंतर कुडाळ येथे उपमुख्यमंत्री एकनाथ शिंदे यांची आभार सभा पार पडली होती. शिवसेना आमदार नीलेश राणे यांनी या आभार सभेचे आयोजन केले होते. मंत्री उदय सामंत, योगेश कदम यांच्यासह आमदार आणि पदाधिकारी उपस्थित होते. पण आमदार दीपक केसरकर उपस्थित नव्हते. यामुळे पुन्हा एकदा त्यांच्या नाराजीच्या चर्चा सुरू झाल्या होत्या. पण ते त्यांच्या आजारपणामुळे सभेला उपस्थित नसल्याचे पुढे आले होते.

काही दिवसांपूर्वी त्यांना ह्रदय विकारचा त्रास जाणवत होता. यानंतर त्यांचे 'बायपास' ऑपरेशन करण्यात आले होते. प्रकृती ठीक झाल्यानंतर या महिन्याच्या पहिल्या आठवड्यात ते पुन्हा आपल्या कामाला लागले होते. सावंतवाडी मतदारसंघात 13 रुग्णवाहिकांचे लोकार्पण केले. मात्र या कार्यक्रमात त्यांनी राजकीय निवृत्तीचे संकेत दिले होते. राजकारण हे निवडणुकांपुरतं असतं. पदाला चिकटून राहणारा मी नाही. यापुढे निवडणूक लढवण्याची माझी इच्छा नाही, असे ते म्हणाले होते. त्यामुळे त्यांनी निवृत्ती घेतल्याचे बोलले गेले.

पण या वक्तव्यावरून दीपक केसरकर यांनी युटर्न घेतला आहे. "ते वक्तव्य मी गमतीने केले होते, पुढील काळात आमदारकी नाही पण राज्यसभा किंवा विधान परिषदेची निवडणूक लढवण्याची आपल्यात ताकद आहे. नवीन युवकांना संधी देण्यासाठी मी हा निर्णय घेतला आहे," असे म्हणत राजकीय निवृत्तीच्या निर्णयावरून त्यांनी युटर्न घेतला आहे. त्यामुळे आगामी काळात सावंतवाडी मतदारसंघातून नवीन चेहरा देऊ, मात्र विधान परिषद किंवा राज्यसभेच्या माध्यमातून सक्रिय राहणार असल्याचे त्यांनी स्पष्ट केले.