Eknath Shinde Politics : शिवसेनेची एकहाती सत्ता, तरी उपनगराध्यक्ष बनला अपक्ष; धक्कादायक निर्णयाने अनेकांना अनपेक्षित धक्का!

Lanja Nagar Panchayat News : काहीच दिवसांच्या आधी लांजा नगर पंचायतीची निवडणूक झाली असून निकालही लागला आहे. येथे शिवसेनेने पुन्हा एकदा वर्चस्व प्रस्थापित केले असून नगराध्यक्षपदी शिवसेनेच्या सावली सुनील कुरूप निवडून आल्या आहेत. तर १७ जागा असणाऱ्या नगर पंचायतीत १० जागांवर शिवसेनेचे नगरसेवक निवडून आले आहेत. यामुळे उपनगराध्यक्ष आणि दोन स्वीकृत नगरसेवक पदावर कोणाची निवड होणार? याकडे शिंदेंच्या शिवसेनेतील अनेक मात्तबरांचे लक्ष लागले होते. पण शिवसेनेची एकहाती सत्ता असतानाही उपनगराध्यक्षपदी अपक्ष नगरसेवक मिलिंद उर्फ बाबा लांजेकर यांची निवड करण्यात आली आहे. या नियुक्तीमुळे शिवसेनेसह अनेकांना आश्चर्याचा धक्का बसला आहे.

लांजा नगर पंचायतीची निवडणूक २ डिसेंबर रोजी झाली तर २३ डिसेंबर रोजी निकाल जाहीर करण्यात आला होता. लागलेल्या निकालात पुन्हा एकदा येथील सत्ता शिवसेनेकडे गेल्याचे दिसून आले होते. तर १७ पैकी १० जागांवर महायुतीचे नगरसेवक निवडून आले होते.ज्यात नऊ नगरसेवक शिवसेनेचे एक नगरसेवक भाजपचा आणि ६ ठिकाणी अपक्ष नगरसेवक निवडून आले. तर एका जागेवर शिवसेनेचा (उबाठा) नगरसेवक झाला आहे.

दरम्यान आता उपनगराध्यक्ष आणि दोन स्वीकृत नगरसेवक पदावर कोणाची निवड होणार? याकडे लांजा वासियांचे लक्ष लागून राहिले असतानाच शिंदेंच्या शिवसेनेनं स्व‍कीयांना मोठा धक्का दिला आहे. उपनगराध्यक्षपदाची माळ अपक्ष नगरसेवक मिलिंद उर्फ बाबा लांजेकर यांच्या गळ्यात टाकली आहे. तर स्वीकृत नगरसेवकपदी शिवसेनेकडून नगरसेविका दुर्वा भाईशेट्ये आणि सचिन डोंगरकर यांची बिनविरोध निवड करण्यात आली.

यावेळी शिवसेना आमदार किरण सामंत यांनी लांजेकर यांचा सत्कार करत उपनगराध्यक्ष पदाच्या खुर्चीत विराजमान केले. त्याचप्रमाणे स्वीकृत नगरसेवकपदी निवड झालेल्या भाईशेट्ये यांचा नगराध्यक्ष सावली कुरूप यांच्या हस्ते तर नवनिर्वाचित नगरसेवक डोंगरकर यांचा जिल्हाप्रमुख राहुल पंडित यांच्या हस्ते शाल, श्रीफळ, पुष्पगुच्छ देऊन सत्कार करण्यात आला.

उपनगराध्यक्ष लांजेकर यांनी आमदार सामंत यांनी टाकलेला विश्वास आपण नक्कीच सार्थकी लावणार असून यापुढे शहराच्या सर्वांगीण विकासासाठी सर्व राजकीय मतभेद विसरून आणि सर्वांना सोबत घेऊन शहराच्या सर्वांगिण विकासासाठी प्रयत्नशील राहणार असल्याचे सांगितले आहे.

तसेच आमदार किरण सामंत म्हणाले की, नगरपंचायत निवडणुकीत लांजा वासियांनी जो महायुतीवर आणि आमच्यावर विश्वास दाखवला आहे त्या विश्वासाला तडा जाऊ दिला जाणार नाही. विकास कामे करताना कोणताही भेदभाव किंवा दुजाभाऊ केला जाणार नाही. सर्वांना विश्वासात घेऊनच कामे केली जातील आणि लांजा शहराचा सर्वांगीण विकास साधला जाईल.

FAQs :

1. लांजा नगर पंचायतीची निवडणूक कधी झाली?
लांजा नगर पंचायतीची निवडणूक २ डिसेंबर रोजी झाली होती.

2. निवडणुकीचा निकाल कधी जाहीर झाला?
२३ डिसेंबर रोजी निकाल जाहीर करण्यात आला होता.

3. शिवसेनेने किती जागा जिंकल्या?
महायुतीच्या माध्यमातून शिवसेनेने १७ पैकी १० जागांवर विजय मिळवला.

4. उपनगराध्यक्षपदी कोणाची निवड झाली?
अपक्ष नगरसेवक मिलिंद उर्फ बाबा लांजेकर यांची उपनगराध्यक्षपदी निवड झाली आहे.

5. उपनगराध्यक्ष अपक्ष का निवडण्यात आला?
शिवसेनेची एकहाती सत्ता असतानाही राजकीय समीकरणांमुळे अपक्ष उमेदवाराची निवड करण्यात आल्याचे मानले जात आहे.