Mangesh Kalokhe Murder : शिवसेनेच्या मंगेश काळोखेंच्या हत्येचा आरोपी वाल्मिक कराडशी संबंधित? आमदाराने उघडं केलं बीड कनेक्शन

- कैलास म्हामले

Raigad News : रायगड जिल्ह्यातील खोपोली येथील शिवसेना कार्यकर्ते मंगेश काळोखे यांच्या क्रूर हत्येप्रकरणी उर्वरित आरोपींना तात्काळ अटक करावी, अशी मागणी शिवसेना आमदार महेंद्र थोरवे यांनी पत्रकारांशी संवाद साधताना केलीय. २६ तारखेला मंगेश काळोखे यांची निर्घृण हत्या करण्यात आली असून, या घटनेमुळे संपूर्ण परिसरात संतापाचे वातावरण आहे. यावेळी आमदार थोरवे म्हणाले की, या प्रकरणात आतापर्यंत पोलिसांनी नऊ आरोपींना अटक केली असून त्यांना पाच तारखेपर्यंत पोलीस कोठडी देण्यात आली आहे. मात्र या कटामध्ये सहभागी असलेले सुधाकर घारे, भरत भगत आणि चव्हाण यांना अद्याप अटक झालेली नाही. हे तिघेही आरोपी अद्याप फरार आहेत. या आरोपींना अटक न झाल्याने पोलिसांवर राष्ट्रवादीकडून कोणत्याही प्रकारचा राजकीय दबाव आहे का? असाही सवालही त्यांनी उपस्थित केलाय.

मंगेश काळोखे यांच्या कुटुंबीयांनी दिलेल्या माहितीनुसार, बीड जिल्ह्यातीलच एक गुन्हेगार या हत्येप्रकरणात थेट सहभागी असून तो तिकडे वॉन्टेड असतानाही रवी देवकरने त्याला खास मंगेश काळोखे यांची हत्या करण्यासाठी खोपोलीत आणल्याचा गंभीर आरोप करण्यात आला आहे. हा बॉडीगार्डही बीडमधीलच असून मंगेश यांच्या हत्येमध्ये त्याचा सर्वात मोठा सहभाग असल्याचे सांगण्यात येते.

सीसीटीव्ही फुटेजनुसार या बॉडीगार्डने मंगेश यांच्यावर तब्बल १३ वेळा वार केल्याचे स्पष्ट दिसते. या संपूर्ण घटनेमागे राष्ट्रवादीचे कनेक्शन असून धनंजय मुंडे, वाल्मिक कराड आणि रवी देवकर यांचा संबंध असल्याचा आरोप करण्यात आला आहे, असे असतानाही राष्ट्रवादीच्या कार्यकर्त्यांकडून हे कृत्य घडले असतानाही सुनील तटकरे कर्जतमध्ये येऊन संबंधित आरोपींना पाठबळ देत त्यांना वाचवण्याचा प्रयत्न करत असल्याचा आरोप थोरवे यांनी केला आहे.

यावेळी त्यांनी काळोखे यांच्या हत्येच्या निषेधार्थ सोमवार (ता.२९) साईबाबा नगर खोपोली ते खोपोली पोलीस स्टेशन असा कॅण्डल मार्च काढण्यात येणार असल्याची माहिती दिली आहे. तर सीसीटीव्ही फुटेजमध्ये मंगेश काळोखे यांच्यावर अमानुषपणे हल्ला केल्याचे स्पष्ट दिसत असून, या घटनेचा तीव्र निषेध करण्यात येणार असल्याचे त्यांनी सांगितले आहे. तसेच या प्रकरणात सर्व आरोपींना तात्काळ अटक करावी, त्यांच्यावर मोक्का अंतर्गत कारवाई करावी तसेच हा खटला फास्टट्रॅक न्यायालयात चालवून दोषींना कठोर शिक्षा द्यावी, अशा प्रमुख मागण्या असल्याचे आमदार थोरवे यांनी स्पष्ट केले आहे.

शिवाय जर उर्वरित आरोपींना तात्काळ अटक झाली नाही, तर कॅण्डल मार्चनंतर शिवसैनिक खोपोली पोलीस स्टेशनमध्ये ठिय्या आंदोलन करू, असा इशाराही आमदार थोरवे यांनी दिला आहे. यावेळी त्यांनी, “माझ्या कार्यकर्त्याची हत्या होत असताना आम्ही गप्प बसणार नाही. न्याय मिळेपर्यंत हा लढा सुरूच राहील,” असेही ठाम भूमिका घेतली आहे. या प्रकरणी संपूर्ण खोपोली शहर व कर्जत मतदारसंघातील शिवसैनिक एकत्र येऊन न्यायासाठी आवाज उठवणार असल्याचेही आमदार थोरवे यांनी सांगितले आहे.

दरम्यान आमदार थोरवे यांनी स्व.मंगेश काळोखे यांच्या पत्नी आणि कुटुंबीयांची भेट घेऊन उद्याच्या कॅन्डल मार्च मध्ये सहभागी होण्याचे आवाहन केले आहे. यावेळी त्यांनी उपस्थित ग्रामस्थ , नातेवाईक महिला यांना भावनिक साद घातली. यावेळी त्यांच्यासोबत जिल्हाप्रमुख संतोष भोईर, खोपोली नगराध्यक्ष कुलदीपक शेंडे, माथेरान नगराध्यक्ष चंद्रकांत चौधरी,जिल्हा पदाधिकारी विनोद साबळे यांसह पदाधिकारी आणि कार्यकर्ते मोठ्या संख्येने उपस्थित होते.

FAQs :

1. मंगेश काळोखे कोण होते?
ते खोपोली येथील शिवसेना कार्यकर्ते होते.

2. हत्या प्रकरणात कोणते आरोप करण्यात आले आहेत?
या हत्येमागे राष्ट्रवादी काँग्रेसचे कनेक्शन असल्याचा आरोप आमदार महेंद्र थोरवे यांनी केला आहे.

3. बीड कनेक्शन म्हणजे काय?
आरोपीचा बॉडीगार्ड बीड जिल्ह्यातील असून त्याचे संबंध काही राजकीय नेत्यांशी असल्याचा दावा आहे.

4. या प्रकरणात किती आरोपी अटकेत आहेत?
सध्या काही आरोपी अटकेत असून उर्वरित आरोपींच्या अटकेची मागणी सुरू आहे.

5. पुढील कारवाई काय असू शकते?
सखोल तपास, उर्वरित आरोपींची अटक आणि राजकीय चौकशीची शक्यता आहे.