बेकायदा उत्खनन करणाऱ्यांना दणका, वाहन परवाना रद्द होणार?; एकनाथ शिंदेंच्या शिलेदाराकडे असलेल्या खात्याचा ठराव

Mumbai News : राज्यात मोठ्या प्रमाणात वाळू व इतर गौण खनिजांचे बेकायदा उत्खनन, वापर, वाहतूक व तस्करीचे वारंवार प्रकार घडत आहेत. ‘वाळू व इतर गौण खनिजांचे बेकायदा उत्खनन, वापर व वाहतूक करणाऱ्या वाहनांवर विभागीय कारवाई करण्याबाबत राज्य परिवहन प्राधिकरणाचा निर्णय घेतला आहे. त्याप्रमाणे वाहनचालकांचा परवाना रद्द करण्याचा ठराव करण्यात आला आहे.

मोटार वाहन अधिनियम, 1988च्या कलम 113 चा भंग करून सकल भारक्षमतेपेक्षा (जी.व्ही.डब्ल्यू.) अतिरिक्त वजनाच्या वाळू व इतर गौण खनिजांची मालाची वाहतूक करणाऱ्या परवानाधारकांवर विभागीय कारवाई करण्याचा निर्णय घेण्याचे अधिकार राज्य परिवहन प्राधिकरणास आहेत.

त्यानुसार वाळू व इतर गौण खनिजांचे बेकायदा उत्खनन करून बेकायदा वाहतूक करणाऱ्या वाहनांवर आळा घालण्यासाठी व प्रादेशिक परिवहन प्राधिकरणाच्या धोरणात एकसूत्रता आणण्यासाठी राज्य परिवहन प्राधिकरणाने नुकत्याच झालेल्या बैठकीत ठराव करण्यात आला आहे.

यात वाळू व इतर गौण खनिजांचे अनधिकृत उत्खनन करून बेकायदा वाहतूक करणाऱ्या वाहनांच्या परवान्यावर मोटार वाहन अधिनियम, 1988च्या कलम 86 मधील तरतुदीनुसार विभागीय कारवाई करण्यासाठी राज्यातील सर्व प्रादेशिक परिवहन प्राधिकरणांनी पुढीलप्रमाणे विभागीय कारवाई करण्याचे निर्देश राज्य परिवहन प्राधिकरणाने दिले.

गुन्हा केल्यास कारवाईचे स्वरूप

पहिला गुन्हा : 30 दिवस परवाना निलंबित व वाहन अटकावणी

दुसरा गुन्हा : 60 दिवस परवाना निलंबित व वाहन अटकावणे

तिसरा गुन्हा : वाहन अटकाव करून परवाना रद्द करण्यासाठी संबंधित प्रादेशिक परिवहन प्राधिकरणामार्फत कार्यवाही करणे

FAQs :

1. राज्य परिवहन प्राधिकरणाने कोणता निर्णय घेतला?
बेकायदा वाळू व गौण खनिज वाहतूक करणाऱ्या वाहनचालकांचा परवाना रद्द करण्याचा.

2. ही कारवाई कोणावर होणार आहे?
बेकायदा वाळू उत्खनन, वापर व वाहतुकीत सामील वाहनांवर.

3. सरकारने हे पाऊल का उचलले?
वाळू माफियांना रोखण्यासाठी आणि अवैध खनिज वाहतुकीवर नियंत्रण ठेवण्यासाठी.

4. वाहनचालकांना काय दंड होणार?
त्यांचा परवाना रद्द केला जाईल.

5. या निर्णयाचा परिणाम काय होईल?
बेकायदा वाळू वाहतूक आणि खनिज तस्करीत घट होण्याची शक्यता आहे.