Sunil Tatkare: दोन्ही राष्ट्रवादी काँग्रेस पक्षांचं विलिनिकरण होणार? सुनील तटकरेंनी दिले संकेत

Sunil Tatkare: राज्यातील महानगरपालिका निवडणुकीच्या निमित्ताने पुणे, पिंपरी चिंचवडमध्ये राष्ट्रवादी काँग्रेस पक्ष आणि राष्ट्रवादी काँग्रेस शरदचंद्र पवार पक्ष एकत्र आले आहेत. सध्या या दोन महापालिकांपुरतीच सध्या ही आघाडी मर्यादित आहे. पण आता या दोन्ही पक्षांचं एकत्रिकरण होणार असल्याची चर्चा सुरू झाली आहे. त्याच कारण म्हणजे अजित पवारांच्या राष्ट्रवादी काँग्रेस पक्षाचे प्रदेशाध्यक्ष सुनील तटकरे यांनी याबाबत संकेत दिले आहेत.

एनडीए आघाडी सोबत जाण्याचा निर्णय आम्ही घेतला. यावर अनेक वर्षापासून पक्षात चर्चाही व्हायची पण दरवेळी त्यातून माघार घेतली जायची, शेवटी आम्ही निर्णय घेतला. यावरून आम्हाला टीकाही सहन करावी लागली आजही ती करत आहोत. त्यामुळे भविष्यात दोन्ही राष्ट्रवादीच्या एकत्रीकरणाचा किंवा विलणीकरणाचा निर्णय झाला तर त्यास माझा व्यक्तिगत विरोध असणार नाही, अशी स्पष्ट भूमिका तटकरे यांनी मांडली. परंतू निर्णय हा सामूहिक असेल हे सांगायलाही ते विसरले नाहीत.

छत्रपती संभाजीनगर महापालिका निवडणुकीच्या प्रचारानिमित्त त्यांनी पत्रकारांशी संवाद साधला. संभाजीनगर महापालिकेचे निवडणूक आम्ही कुठलीही पोकळी भरून काढण्यासाठी लढवत नाही. स्थानिक स्वराज्य संस्थांच्या निवडणुका बऱ्याच वर्षांनी होत असल्याने कार्यकर्त्यांना कुठेतरी न्याय मिळावा या हेतूने आम्ही संभाजीनगरमध्ये सर्वाधिक जागा लढवत आहोत.

पुणे, पिंपरी-चिंचवडमध्ये दोन्ही राष्ट्रवादी एकत्र निवडणूक लढवत असल्याने कार्यकर्त्यांमध्ये आनंद, उत्साह असणे स्वाभाविक आहे. परंतू सध्या तरी हा निर्णय पुणे, पिंपरी-चिंचवड पुरताच मर्यादित आहे. राहिला प्रश्न विलनीकरणाचा तर आतापर्यंत प्रदेशाध्यक्ष म्हणून माझ्याशी यासंदर्भात कुठलीही चर्चा झालेली नाही. अजित पवार हे आमच्या पक्षाची राष्ट्रीय अध्यक्ष आहेत ते या संदर्भात भूमिका मांडू शकतात, असेही तटकरे यांनी स्पष्ट केले.

शिरसाट कोणत्या अधिकाराने बोलले

शरद पवार हे एनडीएमध्ये जातील, असे भाकीत काही दिवसांपूर्वी शिवसेनेचे मंत्री संजय शिरसाट यांनी माध्यमांशी बोलताना केले होते. या संदर्भात तटकरे यांना छेडले असता संजय शिरसाट यांनी हे वक्तव्य कोणत्या अधिकारात केले, आपल्याला माहीत नाही. भूमिका मांडताना ते कधी कधी घसरतात, त्यांचे विधान हे वैयक्तिक मत असू शकते, अशा शब्दात तटकरे यांनी त्यांना टोला लगावला.