Dada Bhuse News : जबाबदारी मिळताच शालेय शिक्षण मंत्री ॲक्टिव्ह मोडवर; थेट शाळांमध्ये जाऊन जाणून घेतल्या अडचणी

Nashik News : मुख्यमंत्री देवेंद्र फडणवीस यांच्या नेतृत्वाखालील महायुती सरकारचा मंत्रिमंडळ विस्तार आणि खातेवाटप पार पडले. नागपुरातील विधिमंडळ अधिवेशन पार पडल्यानंतर आता सर्वच मंत्र्यांनी नव्या खात्याचा पदभार स्वीकारत कामाला सुरुवात केली आहे. त्यातच शालेय शिक्षण मंत्री पदाची जबाबदारी दादा भुसे यांच्याकडे आली आहे.

पहिल्याच दिवशीपासून दादा भुसे यांनी कामाला सुरुवात केली आहे. शालेय शिक्षण खात्याचा पदभार घेत पहिल्याच दिवशी त्यांनी अचानक शाळांना भेटी दिल्या. यावेळी त्यांनी थेट शाळांमधील वर्गात जाऊन विद्यार्थी व शिक्षकांशी संवाद साधत अडचणी जाणून घेतल्या. (Dada Bhuse News)

नागपुरचे हिवाळी अधिवेशन पार पाडल्यानंतर शनिवारी रात्री उशिरा मंत्रीमंडळाचे खातेवाटप जाहीर कऱण्यात आले. त्यानंतर राज्यातील मंत्री मतदारसंघात पोहचले. त्यानंतर स्वागत स्वीकरून अनेक मंत्र्यांनी सोमवारी मंत्रालयात जाऊन पदभार घेतला. परंतु, शालेय शिक्षण मंत्रीपदाची जबाबदारी मिळालेले मंत्री दादा भुसे (Dada Bhuse) यांनी थेट शाळांना भेटी दिल्या. मालेगाव तालुक्यातील शाळांमध्ये जाऊन त्यांनी विद्यार्थ्यांकडून वाचन करुन घेतले. यावेळी शिक्षकांच्या समस्या जाणून घेतल्या.

शिवसेनेचे नेते (Shivsena) तथा मंत्री दादा भुसे यांनी मालेगाव तालुक्यातील अनेक शाळांना अचानक दिल्या भेटी दिल्या. शालेय आरोग्य, आरोग्य तपासणी, विद्यार्थी पोषण आहार यांची माहिती घेतली. त्यासोबतच विद्यार्थी अन् शिक्षकांच्या अडचणी समाजावून घेतल्या. यावेळी त्यांनी शाळेतील सोयीसुविधांचा आढावा घेतला.

मालेगाव तालुक्यातील देवरपाडे गावातील शाळेत भुसे यांनी भेट दिली. त्यांनी यावेळी विद्यार्थ्यांकडून वाचन करुन घेतले. कविता म्हणून घेतल्या. मराठी आणि इंग्रजी कविता विद्यार्थ्यांनी म्हटल्या. त्यासोबतच विद्यार्थी, शिक्षकांच्या समस्या समजून घेतल्या. शाळांना भेट दिल्यानंतर भुसे म्हणाले, 'शाळांचा शैक्षणिक दर्जा उंचावण्यासाठी येत्या काळात काम केले जाणार आहे. या शाळा भेटीतून त्यांनी समस्या समजून घेतल्या. राज्यातील विद्यार्थ्याना चांगले शिक्षण मिळवण्याचा प्रयत्न आपण सर्व मिळून करू. विद्यार्थी, पालक, संस्था यांना विश्वासात घेऊन काम करू. अनेक गावांतील शाळांचा दर्जा सुधारला आहे. त्यांचे अनुकरण इतर ठिकाणी करण्यात येईल.'

येत्या वर्षभरात संपूर्ण शिक्षण विभागात बदल दिसणार आहे. सर्वच शाळांचा दर्जा सुधारला जाणार आहे. ज्या सुविधा खासगी शाळांकडे आहे, त्या सुविधा आम्ही ग्रामीण भागातील शाळांमध्ये देणार आहोत. इंग्रजी माध्यमांकडे जाणारे विद्यार्थी आमच्या शाळांमध्ये प्रवेश घेण्यासाठी नंबर लावतील. शाळा भेटी दरम्यान विद्यार्थ्यांच्या आरोग्याची तपासणी करण्यात आल्याचे दिसून आले आहे. यावेळी काही सोयी, सुविधांची मागणी ग्रामस्थांनी केली आहे. त्या सुविधा येत्या काळात त्यांना देण्यात येईल, असेही दादा भुसे यांनी स्पष्ट केले.