Sangli Politics : भाजप प्रदेशाध्यक्षांचं काँग्रेस जिल्हाध्यक्षांच्या घरी स्नेहभोजन : जेवताना पक्षप्रवेशाचा मुहूर्तही काढला

काँग्रेसचे सांगली शहर-जिल्हाध्यक्ष पृथ्वीराज पाटील यांच्या भाजपप्रवेशावर अखेर शिक्कामोर्तब झाले. बुधवारी (13 ऑगस्ट) दुपारी 3.30 वाजता मुंबई येथे मुख्यमंत्री देवेंद्र फडणवीस यांच्या उपस्थितीत त्यांचा पक्षप्रवेश होणार आहे. सोमवारी सांगली दौऱ्यावर असलेले भाजप प्रदेशाध्यक्ष रवींद्र चव्हाण, पालकमंत्री चंद्रकांत पाटील, ग्रामविकास मंत्री जयकुमार गोरे, आमदार सुरेश खाडे यांनी पृथ्वीराज पाटील यांच्या वसंत कॉलनीतील घरी जाऊन स्नेहभोजन केले. यावेळी पाटील यांच्या पक्षप्रवेश निश्चित झाला.

मागील काही दिवसांपासून पृथ्वीराज पाटील यांच्या भाजप प्रवेशाबाबतच्या चर्चा सुरु आहे. यापूर्वी दोनवेळा त्यांचा भाजप प्रवेश लांबला होता. या दरम्यान, काँग्रेस नेत्यांनीही पाटील यांना थांबविण्यासाठी जोराचे प्रयत्न केले. पण या प्रयत्नांना आता अपयश येताना दिसत आहे. त्यांच्या भाजपप्रवेशाचा मुहूर्त एकदाचा ठरला आहे. जयकुमार गोरे हे पाटील यांच्या भाजप प्रवेशाबाबत सातत्याने आग्रही भूमिका मांडत होते. भाजप प्रवेश निशिचित झाल्यानंतर पृथ्वीराज पाटील आज काँग्रेसच्या शहर-जिल्हाध्यक्षपदाचा आणि क्षाच्या सदस्यत्वाचाही राजीनामा देणार आहेत.

यावेळी रवींद्र चव्हाण म्हणाले, "पृथ्वीराज पाटील यांच्यासारखा सामाजिक क्षेत्राची जाण असलेला नेता आमच्या पक्षात येत आहे. त्यांच्या स्वप्नातील सांगलीचा विकास करण्यासाठी आम्ही त्यांच्यासमवेत असू. तर "भाजपमध्ये सर्वांचा सन्मान होईल. महापालिका, पदे, निधी यात कुणीही नाराज होणार नाही, असे आश्वासन मंत्री चंद्रकांत पाटील यांनी दिले. पृथ्वीराज पाटील यांनीही सांगलीच्या विकासाचा वसा घेऊन भाजपमध्ये प्रवेश करत आहे, माझ्यासाठी सांगली फर्स्ट असेल असे सांगलीकरांना आश्वासित केले.

यावेळी 'जनसुराज्य' चे नेते समित कदम, माजी आमदार दिनकर पाटील, पृथ्वीराज पवार, नीता केळकर, शेखर इनामदार, प्रकाश ढंग, सिद्धार्थ गाडगीळ, बिपिन कदम, युवराज पाटील, टी डी पाटील, ए. डी. पाटील, बाळासाहेब गुरव, अशोकसिंह रजपूत, भारती भगत, कांचन तुपे, महावीर पाटील, आप्पासाहेब पाटील, अजय देशमुख, सनी धोत्रे आदी नेते आणि कार्यकर्ते उपस्थित होते. पृथ्वीराज पाटील, वीरेंद्र पाटील, विजया पाटील आणि कुटुंबीयांनी त्यांचे स्वागत केले.