Barshi Politic's : ‘आर्यन शुगर’चे नाव घेताच सोपलांनी राऊतांची हिस्ट्रीच काढली; म्हणाले, ‘मटका, जुगार, हातभट्टी...मलाच लाज वाटते’

Solapur, 07 August : बार्शीच्या राजकारणात आमदार दिलीप सोपल आणि माजी आमदार राजेंद्र राऊत हे पुन्हा एकदा आमने सामने आले आहेत. सोलापूर जिल्ह्यातील तीन कारखान्यांत 100 कोटींचा साखर घोटाळा झाला आहे, त्यात बार्शीचा आर्यन शुगर आहे, असा दावा माजी आमदार राऊत यांनी केला होता. त्याला उत्तरे देताना आमदार दिलीप सोपल यांनी राऊतांची संपूर्ण हिस्ट्रीच बाहेर काढली आहे.

आमदार दिलीप सोपल (Dilip Sopal) यांनी पत्रकार परिषद घेऊन माजी आमदार राजेंद्र राऊतांवर हल्लाबोल केला आहे. ते म्हणाले, कांगावा आणि आक्रस्ताळेपणा करायचा, ही ह्यांची पद्धत पूर्वीपासूनच आहे. एक अपवाद वगळता माझे सर्व विरोधक सुसंस्कृत आहेत. कमी शिकलेले असतील, पण खऱ्या अर्थाने सुशिक्षित आहेत. पण, दोन नंबरचे धंदे करून दुसऱ्यावर आरोप करायचे आणि स्वतः मात्र साजूक आहे, असं दाखवायचं, ही ह्यांची पद्धत आहे.

तुमचे मूळ उद्योग काय होते, हे सर्व बार्शीकरांना माहिती आहे. तिसऱ्या, चौथ्या पिढीला माहिती झालं आहे की, तुम्ही काय उद्योग करून पुढे आलेला आहात. तुम्ही काय टाटा, बिर्लांच्या घरात जन्म घेतलेला नाही. तुम्ही काय काय उद्योग केले, हे दरवेळी मला सांगायलाही आता लाज वाटायला लागली आहे. काय केलं नाही ह्यांनी. धान्याचा काळाबाजार, मटका, जुगार, हातभट्टी. काय केलं नाही तुम्ही आणि कोणावर आरोप करता? स्वतः बरटलेले असताना मी पवित्र आहे; म्हणून दुसऱ्यांवर शिंतोडे उडविण्याचा प्रयत्न करणे, हे दोन वेळा लोकप्रतिनिधीत्व करणाऱ्या व्यक्तीला शोभत नाही, असा टोला सोपल यांनी राजेंद्र राऊतांना (Rajendra Raut) लगावला.

तुम्ही कसे का असेना, पण या बार्शी तालुक्याचे दोन टर्म आमदार म्हणून काम केले आहे. जरा भान जागेवर ठेवून बोललं आणि वागलं पाहिजे. बेभान होऊन बेताल वागणं, ते काय शोभा देत नाही. इथून पुढे तुम्ही जर अशीच भाषा वापरली तर मलासुद्धा त्या पातळीवर येऊन ती भाषा वापरता येते आणि मी आता वापरल्याशिवाय राहणार नाही, असा इशाराही सोपल यांनी दिली.

सोपल म्हणाले, आम्ही दरवेळी शांत राहतो, म्हणजे आम्ही साधू संत नाही. आमचासुद्धा बार्शीतलाच जन्म आहे. आम्हालाही सगळे प्रकार माहिती आहेत, येतात. पण, लोकांनी आम्हाला अनेकदा निवडून दिले आहे, त्यामुळे पूर्वसूरींच्या लोकप्रतिनिधींच्या परंपरेप्रमाणे वागण्याचा प्रयत्न करतोय.

ते म्हणाले, तुम्ही कशा पद्धतीने मार्केट यार्डमध्ये कारभार केला आहे, हे सर्व बार्शीला माहिती आहे. खासगी बाजार समितीत कांदा अनुदानाचे काय केले आहे, त्याची विल्हेवाट कशी लावली आहे, तीही माहिती आमच्याकडे गोळा झाली आहे.

तुमची जीएसटी आणि इनकम टॅक्स याबाबत तुम्ही कशा पद्धतीने केलं आहे, याची माहिती आमच्याकडे आहे. जसे तुम्ही जाणार आहात, तसं आम्हीही जाणारच आहे. आम्ही काय सोडणार नाही, आमच्याकडेही तुमची माहिती आलेली आहे. त्यामुळे ज्या गावच्या बोरी, त्याच गावच्या बाभळी असतात, हे लक्षात ठेवून प्रत्येकाने वागले पाहिजे, असा सल्लाही सोपल यांनी राऊतांना दिला.