Dhananjay Munde : लक्ष्मण हाकेंचा मोठा दावा; ‘मी जबाबदारीने सांगतोय...धनंजय मुंडेही काही दिवसांतच मंत्रिमंडळात दिसतील’

Solapur, 20 May : माजी उपमुख्यमंत्री छगन भुजबळ यांचे राज्याच्या मंत्रिमंडळात पुनरागमन झाले आहे. धनंजय मुंडे यांच्या रिक्त जागी भुजबळांना संधी देण्यात आल्याची चर्चा सुरू आहे. मात्र, ओबीसी नेते प्रा. लक्ष्मण हाके यांनी त्यावर तीव्र आक्षेप घेतला आहे. कोणी कोणाला रिप्लेस करू नये, असे मला वाटतं. धनंजय मुंडे यांना पर्याय म्हणून भुजबळांना मंत्रिपद दिलं असेल, तर ते ओबीसींना आवडणार नाही. त्यामुळे धनंजय मुंडेही काही दिवसांत मंत्रिमंडळात दिसतील, हे मी महाराष्ट्राला जबाबदारीने सांगतो, असे प्रा.लक्ष्मण हाके यांनी म्हटले आहे.

मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार यांच्या उपस्थितीत आज छगन भुजबळ यांनी कॅबिनेट मंत्रिपदाची शपथ घेतली. त्यावर बोलताना हाके यांनी धनंजय मुंडे (Dhananjay Munde)यांच्या मंत्रिपदाबाबत मोठा दावा केला आहे.

प्रा.लक्ष्मण हाके (Laxman Hake) म्हणाले, मला वाटतं कोणी कोणाला रिप्लेस करू नये. अशी रिप्लेसमेंट असेल तर त्यांना ओबीसींचा विश्वास कधीही मिळणार नाही. भुजबळांचं स्वतःचं कर्तृत्व आहे. स्वतःची ओबीसीची ठाम भूमिका आहे. धनंजय मुंडे यांना पर्याय म्हणून भुजबळांना दिलं असेल तर ते ओबीसींना आवडणार नाही. मुंडे काही दिवसात राज्याच्या मंत्रिमंडळात दिसतील, हे मी महाराष्ट्राला जबाबदारीने सांगतो

अजून काही मंत्री महाराष्ट्राच्या मंत्रिमंडळात येणार आहेत. महाराष्ट्राचा एखादा खासदार देशाच्या मंत्रिमंडळात जाणार आहे. सध्या महाराष्ट्रात ‘वेट अँड वॉच, डॅमेज कंट्रोल’ सुरू आहे. महाराष्ट्राच्या मंत्रिमंडळात जयंत पाटील, रोहित पवारांची इंट्री होणार आहे, तर देशाच्या मंत्रिमंडळात सुप्रिया सुळेंची इंट्री आहे. आमचा प्रश्न एकच आहे, आमच्या ओबीसींचे हक्क अधिकार टिकले पाहिजेत, असेही हाकेंनी म्हटले आहे

अंजली दमानिया यांच्या प्रतिक्रियेवर हाके यांनी टीका केली. ते म्हणाले, अंजली दमानिया यांना फक्त भुजबळ दिसतात. बाकीचे दिसत नाहीत. दमानिया यांचा सिलेक्टिव प्रोग्राम आहे. दमानिया, मनोज जरंगे पाटील यांना भुजबळ नावाची काविळ झालेली आहे. त्यांना इतर मंत्री दिसत नाहीत का? अंजली दमानिया पॅकेजवर चालतात. त्या ठराविक मंत्र्यांच्या विरोधात बोलतात, त्यासाठी त्यांना शुभेच्छा आहेत, त्यांनी काहीही बोलावं.

छगन भुजबळ यांच्या कॅबिनेटमधील समावेशाबद्दल आम्ही स्वागत केलं आहे. जी जह माणसं ओबीसींच्या बाबत सकारात्मक भूमिका घेतील, त्या सर्वांचे आम्ही स्वागत करू. जी जी माणसं या धोरणाच्या आड येतील, त्यांना आम्ही कडाडून विरोध करू.. मग ते भाजप, शिवसेना, राष्ट्रवादी अथवा काँग्रेस कोणीही असो. आमचे प्राधान्य ओबीसींना आहे, असे हाकेंनी ठणकावले.