Satara ZP : जयकुमार गोरेंचा शंभूराज देसाई, मकरंदआबांना इशारा : भाजपचा प्लॅन A, B अन्‌ C एक्झिक्यूट झालाय; D अजून व्हायचाय...!

Satara, 04 April : सातारा जिल्हा परिषदेच्या अध्यक्ष, उपाध्यक्ष आणि सभापती निवडणुकीत भारतीय जनता पक्षाचा प्लॅन ए, बी आणि सी एक्झिक्यूट झाला आहे. प्लॅन डी एक्झिक्यूट झाला असता तर चित्र वेगळे दिसले असते. ती वेळ आणखी आलेली नाही. ते वेळ येईल तेव्हा प्लॅन डीसुद्धा एक्झिक्यूट करू, असा इशारा ग्रामविकास मंत्री जयकुमार गोरे यांनी विरोधकांना दिला.

सातारा (Satara) जिल्हा परिषदेच्या अध्यक्ष, उपाध्यक्षपदानंतर चारही विषय समित्यांच्या सभापतिपदी भाजपचे सदस्य बिनविरोध निवडून आले आहेत. त्यानंतर झालेल्या पत्रकार परिषदेत जयकुमार गोरे यांनी हे भाष्य केले आहे. या वेळी सार्वजनिक बांधकाम मंत्री शिवेंद्रसिंहराजे भोसले, माजी खासदार रणजितसिंह नाईक निंबाळकर उपस्थित होते.

सातारा जिल्हा परिषद अध्यक्ष, उपाध्यक्ष आणि त्यानंतर सभापती निवडी झाल्या. पण, आणखी पाच वर्षे बाकी आहेत, असा इशारा पालकमंत्री शंभूराज देसाई यांनी दिला होता, त्याला उत्तर देताना ‘आम्हीही बघायलाच बसलो आहे,’ असा प्रतिइशारा मंत्री जयकुमार गोरे (Jaykumar Gore) यांनी दिला.

ते म्हणाले, आम्हाला कल्पना आहे की, पाच वर्षे कारभार करायचा आहे. सर्वांना सोबत घेऊन लोकाभिमुख काम करण्याचा आमचा प्रयत्न राहणार आहे. पण, सातत्याने धमकी त्यांनी द्यायची आणि ब्लेम आमच्यावर करायचा, असं सातत्याने होत आहे.

ज्यांना आपले सदस्य सांभाळता येत नाहीत. त्यांनी राजकारणावर फार चर्चा करू नये. ते सदस्य मनापासून भाजपसोबत आले आहेत. विराज शिंदे कोणाचे? कर्णेताई कोणाच्या? मागच्या आठवड्यात ते कोणाचे होते?, तशी परिस्थिती आली असती तर तुम्हाला कळलं असतं. आमचा प्लॅन डी एक्झिक्युट झाला नाही; म्हणून तुम्हाला समजलं नाही, असा सूचक भाष्यही गोरे यांनी केले

आम्ही भाजप म्हणून काम करतो : गोरे

भाजपत गट तट नाही, त्यामुळे सभापती ह्या गटाचा, अध्यक्ष, उपाध्यक्ष या गटाचा असं भाजपत काही नाही, आम्ही सर्वजण पक्ष म्हणून एकत्रित काम करत आहोत, असे गोरे यांनी स्पष्ट केले.