Kolhapur Corporation Election : कोल्हापुरात 'हायहोल्टेज ड्रामा!' बंडखोरांचे फोन 'नॉट रीचेबल', तर एका जागेसाठी मोठी फिल्डिंग; आज काय घडणार?

Kolhapur Municipal Corporation : कोल्हापूर महानगरपालिकेसाठी आज अर्ज माघारीची मुदत दुपारी तीन वाजेपर्यंत आहे. काल दिवसभरात सर्वच राजकीय पक्षांमध्ये अपक्ष आणि डमी उमेदवार अर्ज माघारी घेण्यासाठी नेत्यांची धावपळ दिसली. महायुतीतील भाजप शिवसेना आणि राष्ट्रवादी यांच्यात रात्री उशिरापर्यंत अपक्ष आणि बंडखोरांसोबत चर्चा सुरू होती.

तर दुसरीकडे काँग्रेसच्या बंडखोरांवर थेट अजिंक्यतारा कार्यालय येथून फोनाफोनी सुरू होती. काल दिवसभरात मागील सभागृहात झालेल्या तीन महापौर यांच्यासह डमी अर्ज केलेले 48 उमेदवारांनी माघार घेतली. आज दुपारी तीन वाजेर्यंत उमेदवारी अर्ज मागे घेण्याची मुदत आहे. त्या पार्श्वभूमीवर अनेक राजकीय पक्षांकडून बंडखोरांना संपर्क साधण्यात येत आहे. मात्र अनेकाने आपले फोन स्विच ऑफ केल्याने पक्षांची देखील तारांबळ उडाली आहे.

दरम्यान जे बंडखोर उमेदवारी अर्ज मागे घेणार नाहीत. त्यांच्यावर कारवाईचा इशारा सर्वच राजकीय पक्षांकडून देण्यात आला आहे. आज दुपारनंतर कोणत्या प्रभागात कशी निवडणूक होणार हे स्पष्ट होणार असले तरी बहुतेक सर्वच प्रभागात बहुरंगी लढतील होतील, असे दिसते. महापालिकेसाठी मतदान 15 जानेवारीला होणार आहे तर मतमोजणी 16 तारखेला होणार आहे.

अर्ज माघार घेतलेल्यांमध्ये माजी महापौर शोभा बोंद्रे, निलोफर आजरेकर, आनंद माने, विश्वजित मोहिते, सूरमंजिरी लाटकर, दिप्ती लिंग्रस, माधुरी मोहिते, महेश उत्तुरे, मुरलीधर जाधव, कस्तुरी खराडे, विक्रम जरग, प्रसाद शेटे, प्रमिला देशमुख, सरोज जाधव, शीतल मुळीक यांच्यासह 48 उमेदवारांचा समावेश आहे. गुरुवारी माघार घेतलेल्यांमध्ये बहुतांशी डमी अर्ज भरले होते. त्यांच्या नातेवाईकांचे अर्ज वैध ठरल्यानंतर त्यांनी माघार घेतली.

प्रभाग क्रमांक 12 मधील ब या एकाच जागेवर महायुतीची अडचण झाली आहे. राष्ट्रवादीकडून माजी महापौर हसीना फरास व शिवसेनेकडून संगीता पोवार यांचे अर्ज आहेत. उमेदवारी यादीत ब ही जागा शिवसेनेला, तर क ची जागा राष्ट्रवादीला दिली आहे. त्याबाबत आज दिवसभर बराच खल सुरू होता. या मागे अन्य काही अंडरकरंटही असल्याची चर्चा आहे.