Kolhapur ZP Election : बॅलेट पेपरवर निवडणूक का नाही? प्रश्न विचारत ठाकरेंच्या शिवसैनिकाने जागेवर EVM फोडले

EVM Damaged Kolhapur : लोकसभा पाटोपाठ विधानसभा निवडणूक आणि नगरपालिका महानगरपालिका निवडणूक झाल्यानंतर सर्वत्र महायुतीची सत्ता येत आहे. अशा परिस्थितीत राज्यभरातील सर्वच विरोधकांकडून खास करून काँग्रेसकडून बॅलेट पेपरवर निवडणूक घ्यावी अशी मागणी वारंवार करण्यात येत आहे.

बाजूच्या कर्नाटक राज्यात देखील जिल्हा परिषदेच्या निवडणुका या बॅलेट पेपरवर घेण्याच्या हालचाली सुरू असताना आता कोल्हापूर जिल्ह्यात देखील ठाकरेंच्या शिवसैनिकांनी बॅलेट पेपरवर निवडणूक का घेतली नाही? असे विचारत थेट फोडण्याचा धक्कादायक प्रकार घडला आहे.भुदरगड तालुक्यातील नाधवडे येथे एका शिवसैनिकाच्या पदाधिकाऱ्यांनी थेट ईव्हीएम फोडत बॅलेट पेपरवर निवडणूक घ्यावी अशी मागणी केली आहे. कोल्हापूर जिल्ह्यात आज जिल्हा परिषदेच्या निवडणुकीसाठी मतदान होत आहे यावेळी हा प्रकार घडला.

या संपूर्ण प्रकरामुळे मतदान केंद्रावर काही काळ तणावाचे वातावरण निर्माण झाले आहे. यासंबंधी शिवसेना उध्दव बाळासाहेब ठाकरे पक्षाचे ग्राहकसेनेचे जिल्हाप्रमुख जयवंत वायदंडे यांच्याविरुद्ध गुन्हा दाखल करण्यात आला आहे. पोलिसांनी त्यांना ताब्यात घेतले आहे. दुपारी साडे तीनच्या सुमारास जयवंत वायदंडे हे मतदानासाठी केंद्रावर आले. त्यांनी मतदानाचा हक्क बजावला. मात्र अचानक त्यांनी अधिकाऱ्यांना काही समजण्याआधी ईव्हीएम (EVM) मशीन उचलून जमिनीवर आपटले.

घडलेल्या घटनेनंतर अधिकाऱ्यांनी परिस्थिती नियंत्रणात आणली. मतदान केंद्रावरील गोंधळ लक्षात घेता पोलिसांनी देखील तात्काळ या ठिकाणी धाव घेतली. या संबंधित वायदंडे यांना पोलिसांनी ताब्यात घेतले. याप्रकरणी निवडणूक अधिकारी आणि प्रांत अधिकारी सुरेश सूळ यांनी भुदरगड पोलीस ठाण्यात वायदंडे यांच्या विरोधात मतदान प्रक्रियेत अडथळा आणल्या प्रकरणी तक्रार दाखल केली आहे.

मतदान प्रक्रियेत अडथळा आणल्या प्रकरणी वायदंडे यांच्यावर कायदेशीर कारवाई करण्यात येणार असल्याची माहिती पोलीस उपनिरीक्षक योगेश गोरे यांनी दिली. आज सकाळपासूनच या मतदान केंद्रावर शांत आणि उत्साह पूर्ण वातावरणात मतदान प्रक्रियेला सुरुवात झाली होती. मात्र दुपारनंतर वायदंडे यांनी या मतदान केंद्रावर अक्षरशा गोंधळ घाला त्याला गालबोट लावण्याचा प्रयत्न केला.