Mohol Politic's : अजितदादांच्या उमेदवाराला बंदोबस्तात पहाटेच गाठावे लागले अनगर; राजन पाटलांच्या सुनेविरोधात राष्ट्रवादीकडून नगराध्यक्षपदासाठी अर्ज

1. अनगर नगराध्यक्षपदासाठी राष्ट्रवादी काँग्रेसच्या उज्वला थिटे यांनी पोलिस बंदोबस्त मिळाल्यानंतर अखेरच्या दिवशी उमेदवारी अर्ज दाखल केला.

2. या पदासाठी भाजपकडून माजी आमदार राजन पाटील यांच्या सूनबाई प्राजक्ता पाटील यांना उमेदवारी देण्यात आली आहे.

3. उज्वला थिटे यांना अर्ज भरण्यास अडथळे आणल्याच्या आरोपांमुळे पोलिस प्रशासन आणि राजकीय दबावाबद्दल वाद निर्माण झाला होता.

Solapur, 17 November : मोहोळ तालुक्यातील अनगर नगरपंचायतीच्या नगराध्यक्षपदासाठी आज (ता. १७ नोव्हेंबर) अखेरच्या दिवशी उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेस पक्षाच्या वतीने उज्वला थिटे यांनी आपला उमेदवारी अर्ज दाखल केला आहे. गेली चार दिवसांपासून त्यांना उमेदवार अर्ज भरण्यासाठी पोलिस संरक्षण मिळत नव्हते. त्याबाबत राष्ट्रवादीचे जिल्हाध्यक्ष उमेश पाटील यांनी रविवारी सायंकाळी पत्रकार परिषद घेऊन आणि उज्वला थिटे यांनी सोशल मीडियाद्वारे आवाज उठविल्यानंतर त्यांना अखेर सोमवारी पोलिस बंदोबस्त मिळाला.

अनगर नगरपंचायतीचे नगराध्यक्षपद सर्वसाधारण महिला वर्गासाठी आरक्षित झाले आहे. नगराध्यक्षपदासाठी भारतीय जनता पक्षाकडून नुकतेच पक्षात आलेले माजी आमदार राजन पाटील (Rajan Patil) यांच्या धाकट्या सूनबाई प्राजक्ता अजिंक्यराणा पाटील यांना उमेदवारी जाहीर केली आहे. त्यांच्या विरोधात कोण निवडणूक लढविणार याची उत्सुकता होती, ती आज संपली. प्राजक्ता पाटील यांच्या विरोधात अनगरमधीलच उज्वला थिटे यांनी उमेदवारी अर्ज भरला आहे.

अनगर (Angar) ग्रामपंचायतीचे नगरपंचायतीमध्ये रुपांतर झाल्यानंतर ही पहिलीच निवडणूक आहे, त्यामुळे या निवडणुकीबाबत मोहोळ तालुक्यात प्रचंड उत्सुकता आहे. कारण अनगर ग्रामपंचायतीची स्थापनेपासून बिनविरोधची परंपरा आहे, त्यामुळे नगरपंचायतीचा नगराध्यक्ष बिनविरोध होणार की निवडणूक लागणार, याबाबत उत्सुकता होता. मात्र, राजन पाटील यांच्या वर्चस्वाला अनगरमधूच आव्हान देण्यात आले आहे.

अनगरमधील उज्वला थिटे यांनी राष्ट्रवादी काँग्रेस पक्षाकडून अनगर नगरपंचायतीची निवडणूक लढविणार असल्याचे जाहीर केले होते. गेली तीन ते चार दिवसांपासून त्या उमेदवारी अर्ज भरायला अनगरमध्ये जाण्यासाठी प्रयत्न करत होत्या. मात्र, त्यांच्या म्हणण्यानुसार राजन पाटील यांच्या समर्थकांकडून त्यामध्ये अडथळे आणले जात होते. पोलिसांकडून बंदोबस्ताची मागणी करूनही बंदोबस्त दिला जात नव्हता, असा आरोप उज्वला थिटे यांनी केला होता.

अनगरच्या नगराध्यक्षाची बिनविरोध निवडणूक व्हावी, यासाठी आपल्यावर उमेदवारी अर्ज भरू नये, यासाठी अडथळे आणले जात आहेत. राजन पाटील यांच्या माणसांकडून जाणूनबुजून त्रास दिला जात आहे, असा आरोप थिटे यांच्याकडून करण्यात आला होता. त्यामुळे पोलिस प्रशासनाच्या कामकाजाबाबत प्रश्न उपस्थित केले जात होते.

राष्ट्रवादी काँग्रेसचे जिल्हाध्यक्ष उमेश पाटील यांनी याबाबत पत्रकार परिषद घेऊन पोलिसांच्या कामकाजावर जाहीरपणे नाराजी व्यक्त केली होती. तसेच, उज्वला थिटे यांनी सोशल मीडियाच्या माध्यमातून आवाज उठविला होता. त्यानंतर आज थिटे यांना पोलिस बंदोबस्त मिळाला. त्या बंदोबस्तातच त्या पहाटेच अनगरला पोचल्या आणि राष्ट्रवादी काँग्रेस पक्षाच्या एबी फॉर्मवर नगराध्यक्षपदासाठी अर्ज भरला आहे.

1. अनगर नगराध्यक्षपदासाठी राष्ट्रवादी पक्षाकडून कोण उमेदवार आहेत?
उज्वला थिटे या राष्ट्रवादी काँग्रेसच्या उमेदवार आहेत.

2. भाजपकडून या पदासाठी कोणाला उमेदवारी मिळाली आहे?
भाजपकडून प्राजक्ता अजिंक्यराणा पाटील यांना उमेदवारी मिळाली आहे.

3. उज्वला थिटेंना पोलिस बंदोबस्त का लागला?
अर्ज भरण्यात अडथळे आणले जात असल्याचा त्यांनी आरोप केल्याने त्यांना शेवटी बंदोबस्त देण्यात आला.

4. अनगरमध्ये ही निवडणूक महत्त्वाची का आहे?
अनगर प्रथमच नगरपंचायत झाल्याने आणि बिनविरोध परंपरा तुटण्याची शक्यता असल्याने निवडणूक चर्चेत आहे.