Koregaon Politic's : शंभूराज देसाई 11 दिवसांत दुसऱ्यांदा कोरेगावात; राजाभाऊ बर्गेंना ताकद देत महेश शिंदेंना सुनावले

Satara, 02 May : सातारा जिल्हा परिषद अध्यक्षपदाच्या निवडणुकीपासून आमदार महेश शिंदे आणि पालकमंत्री शंभूराज देसाई यांच्यातील वाद दिवसेंदिवस वाढताना दिसत आहे. पालकमंत्री देसाई यांनी 11 दिवसांत कोरेगावचा दुसऱ्यांदा दौरा केला आहे. या दौऱ्यात आमदार शिंदे यांचे विरोधक कोरेगावचे पहिले नगराध्यक्ष राजाभाऊ बर्गे यांना ताकद देत स्वपक्षाच्या आमदाराला चांगलेच फटकारले आहे.

जिल्हा परिषदेच्या अध्यक्ष-उपाध्यक्षपदाच्या निवडणुकीत आमदार महेश शिंदे (Mahesh Shinde) यांनी भाजपला मदत केल्याने पालकमंत्री शंभूराज देसाई कमालीचे नाराज झाले आहेत. त्यांनी आमदार महेश शिंदे यांना पर्याय शोधण्याची चाचपणी करत कोरेगावचे माजी नगराध्यक्ष राजाभाऊ बर्गे यांचा शिवसेनेत प्रवेश घडवून आणला. बर्गेंच्या प्रवेशासाठी खुद्द पक्षाचे मुख्य नेते एकनाथ शिंदे आले होते.

शंभूराज देसाई (Shambhuraj Desai) यांनी उपमुख्यमंत्री एकनाथ शिंदे यांना 20 एप्रिल रोजी कोरेगावातील अंगापूर येथे नेऊन पक्षातील आपली ताकद दाखवून दिली होती. त्यानंतर एक मे रोजी शंभूराज देसाई हे पुन्हा एकदा कोरेगावच्या दौऱ्यावर गेले होते. पण एकनाथ शिंदे आणि शंभूराज देसाई यांच्या दौऱ्यावेळी आमदार शिंदे हे अनुपस्थित राहिले.

शिवसेना शाखा आणि राजाभाऊ बर्गे यांच्या संपर्क कार्यालयाच्या उद्‌घाटनासाठी पालकमंत्री देसाई यांनी महाराष्ट्र दिनी कोरेगावात हजेरी लावली. त्या कार्यक्रमास आमदार महेश शिंदे यांनी पुन्हा दांडी मारत आपण वाकणार नसल्याचे स्पष्ट केले आहे.

याबाबत शंभूराज देसाई म्हणाले, कोरेगावचा छोटा दौरा झाला आहे, मोठा अजून व्हायचा आहे. शिवसेना कोरेगाव विधानसभा मतदारसंघाचा मेळावा लवकरच कोरेगावमध्ये घेणार आहोत. राजाभाऊ बर्गे यांनी आज (ता. 02 मे) खेळ पैठणीचा कार्यक्रम ठेवला आहे, त्याचेच त्यांनी मला निमंत्रण दिले होते. पण पाटण मतदारसंघात खूप कार्यक्रम आणि लग्न असल्यामुळे मी आज कोरेगावच्या दौऱ्यावर आला होतो.

राजाभाऊ बर्गे यांनी शिवसेना प्रवेशाचा घेतलेला निर्णय लोकांना रुचला आहे. उपमुख्यमंत्री एकनाथ शिंदे आणि मी राजाभाऊ बर्गे यांच्या पाठीशी पक्षाची ताकद उभी करण्याचा शब्द दिला आहे. बर्गे हे शिवसेना वाढीचे काम करत आहेत, त्यामुळे पालकमंत्री म्हणून मी त्यांच्या पाठीशी ठामपणे उभा आहे, असे शंभूराज देसाई यांनी स्पष्ट केले.

विद्यमान आमदार कार्यक्रमाला उपस्थित जाणवत आहे, असा प्रश्न पत्रकार विचारत असतानाच शंभूराज देसाई यांनी त्यांचे म्हणणे मध्येच तोडत ‘जाऊ द्या हो, चांगले कार्यक्रम चाललेत आणि काय? ’ असे विधान केले. मात्र बरं विचारा म्हणत त्यावर उत्तर दिले. शेजारी उभे असलेले एका नेत्याला तुमच्या जुन्या मित्राचे विचारतात, असे म्हणत कोटी केली.

शिवसेना शाखा आणि संपर्क कार्यालयाचे उद्‌घाटन आहे. जिथं शिवसेना आणि धनुष्यबाण चिन्ह असते तिथं कोणत्याही नेत्याला, उपनेत्याला, संपर्कप्रमुख, जिल्हाप्रमुख, आमदार, खासदार, मंत्र्यांना निमंत्रण देण्याची पद्धत शिवसेनेत नाही. पक्षाचा कार्यक्रम म्हटलं की सर्वांनी उपस्थित राहिलं पाहिजे, अशी शिवसेनाप्रमुख बाळासाहेब ठाकरे असल्यापासूनची पद्धत आहे. त्यामुळे महेश शिंदेंना बोलावलं, नाही बोलावलं, हा विषय महत्वाचा नाही. हा पक्षाचा कार्यक्रम असून आम्ही पक्षवाढीचे काम करत आहोत, असे शंभूराज देसाई यांनी स्पष्ट केले.