Eknath Shinde : ...म्हणून डॉक्टरांनी एकनाथ शिंदेंना विश्रांतीचा सल्ला दिलाय : शिवसेनेच्या बड्या मंत्र्यांचे केंद्रीय विस्ताराबाबतही भाष्य

Pandhrpur, 04 July : राज्यात एकनाथ शिंदे यांचा झंझावात इतका मोठा आहे की, आगामी काळात ‘ऑपरेशन टायगर’ झालेलेसुद्धा लोकांना कळणार नाही. ‘ऑपरेशन टायगर दोन’ची माहितीसुद्धा समजली नव्हती, त्यामुळे आगामी काळात आमदार, खासदार, माजी मंत्री, कार्यकर्ते असे सारेच शिवसेनेत प्रवेश करतील, असा दावा राज्याचे आरोग्य मंत्री प्रकाश आबिटकर यांनी आज (ता. 04 जुलै) पंढरपुरात केला.

आषाढी यात्रेच्या पार्श्वभूमीवर आरोग्य मंत्री प्रकाश आबीटकर यांच्या उपस्थितीत आरोग्य विभागाच्या प्रमुख अधिकाऱ्यांची बैठक पार पडली. त्या बैठकीनंतर विठ्ठल-रुक्मिणीचे दर्शन घेऊन त्यांनी माध्यमांशी संवाद साधला. आबीटकर यांनी केंद्रीय मंत्रिमंडळात शिवसेनेकडून कोणाला संधी मिळणार, एकनाथ शिंदेंचे आजारपण यावर भाष्य केले आहे.

मंत्री आबीटकर म्हणाले, केंद्रीय मंत्रिमंडळाच्या विस्तारामध्ये शिवसेनेच्या मंत्र्याचे नाव आहे. त्यामध्ये श्रीरंग बारणे यांचे नाव पुढे आहे, असे विचारले असता प्रत्येकाला न्याय देत असताना उपलब्धता पाहून उपमुख्यमंत्री शिंदे निर्णय घेतील, असे स्पष्ट केले.

शिवसेनेचा केंद्रातील चेहरा हा राजकीय उपलब्धतेवर अवलंबून आहे. ऑपरेशन टायगर करत असताना आजी माजी आमदार, माजी मंत्री, हे राजकारण कुणाकडे सुरक्षित आहे. याचा विचार करूनच एकनाथ शिंदेंच्या शिवसेनेत प्रवेश करत आहेत.

उद्धव ठाकरे यांच्या राज्यव्यापी आंदोलनावर बोलताना अबिटकर यांनी, पलीकडे कोण काय करते, यापेक्षा आम्हाला आमची संघटना मजबूत करायची आहे आणि त्यावर, आम्ही लक्ष देऊन आहोत. त्यामुळे समोरचे त्यांच्या पक्षाच्या अजेंड्यानुसार चालत आहेत. शिवसेना येत्या काळात पक्ष संघटनेसाठी काम करणार असल्याचे त्यांनी स्पष्ट केले.

उपमुख्यमंत्री एकनाथ शिंदे हे सध्या रुग्णालयात उपचार घेत आहेत. धावपळीमुळे त्रास होत असल्याने डॉक्टरांनी त्यांना विश्रांतीचा सल्ला दिला आहे. मात्र, शिंदे हे ऐकणारे नाहीत. त्यांना सध्या आरामाची गरज आहे, असेही आरोग्य मंत्री प्रकाश आबीटकर यांनी सांगितले.

उपमुख्यमंत्री एकनाथ शिंदे यांची प्रकृती खालावल्याने त्यांना रुग्णालयात उपचारासाठी दाखल करण्यात आले आहे. या बाबत शिंदे यांच्या प्रकृतीची माहिती आरोग्यमंत्री म्हणून आबीटकर यांनी पंढरपुरात दिली.