Raj Thackeray : '...तर मुंबई हातून गेलीच म्हणून समाज, मराठी माणसासाठी शेवटची निवडणूक', राज ठाकरेंनी केले सावध

Raj Thackeray News : आगामी महापालिका निवडणुकीसाठी राजकीय पक्ष सज्ज झाले आहे. मुंबई महापालिकेत काय होणार याची चर्चा सुरू झाली आहे. आशिष शेलार यांची मुंबई महापालिकेत हिंदू महापौर होणार असे वक्तव्य केले. त्यामुळे विरोधी पक्षांकडून हिंदी भाषिक महापौर भाजप करणार असल्याची टीका झाली. त्यावर मराठी हिंदू नाही का? असे प्रत्युत्तर भाजपकडून देण्यात आले. दरम्यान, राज ठाकरे यांनी मुंबई महापालिकेच्या निवडणुकीत गाफील राहू नका, असे आवाहन केले आहे.

मनसेकडून आयोजित केलेल्या कोकण महोत्सवात राज ठाकरे म्हणाले, 'रात्र वैऱ्याची आहे गाफील राहू नका. अजुबाजूला लक्ष ठेवा. आत्ता ज्या प्रकारचे राजकारण सुरू आहे. मुंबईवर ज्या प्रकारचा डोळा आहे. मतदार याद्यातून ज्या प्रकारचं राजकारण सुरू आहे त्याच्यावर लक्ष ठेवा.'

'मी एकच गोष्ट सांगतो की, येणारी महापालिका निवडणूक ही शेवटची महापालिकेची निवडणूक असेल आपण गाफील राहिलो तर हातातून गेली म्हणून समजा. मराठी माणसांसाठी येणारी निवडणूक ही शेवटची निवडणूक असेल.', असे देखील ते म्हणाले.

मुंबई आपल्या हातातून गेली तर हे लोकं थैमान घालतील म्हणून समजा, असा इशारा देखील राज ठाकरे यांनी दिला. दरम्यान, मुंबई महापालिकेत उद्धव ठाकरे-राज ठाकरे यांची युती निश्चित झाली आहे. कोण किती जागा लढणार हे अजून स्पष्ट झाले नाही.

मनसेला काँग्रेसचा विरोध

उद्धव ठाकरे-राज ठाकरे यांची युती होत असताना महाविकास आघाडी टिकणारी की नाही, याची चर्चा सुरू झाली आहे. दरम्यान, काँग्रेसने मुंबई महापालिका स्वबळावर लढण्याचा निर्णय घेतला असून मनसेसोबत युतीला नकार दिला आहे. दरम्यान, शिवसेना उद्धव बाळासाहेब ठाकरे पक्षातील नेत्यांकडून काँग्रेसच्या युतीचा निर्णय हा स्थानिक पातळीवर होत नाही तो दिल्लीतून होतो, असे सांगत महाविकास आघाडीत मनसे येईल याबाबत विश्वास व्यक्त केला.