Shivsena Politics : 'ऑपरेशन टायगर'ची चर्चा सुरू होताच ठाकरेंनी बोलावली तातडीची बैठक; पण 'या' खासदाराने टाकला मिठाचा खडा? धक्कादायक माहिती समोर...

Maharashtra Politics : देशासह राज्यातील राजकीय घडामोडींना सध्या वेग आला असून बदलत्या राजकीय समीकरणांचा परिणाम महाराष्ट्राच्या राजकारणावरही होताना दिसत आहे. पश्चिम बंगालमधील राजकीय परिस्थितीनंतर देशभरात विविध स्तरांवर पक्षांतर आणि नव्या राजकीय आघाड्यांबाबत चर्चा सुरू असतानाच महाराष्ट्रातही मोठ्या हालचाली घडत असल्याचे बोलले जात आहे.

उपमुख्यमंत्री एकनाथ शिंदे यांनी दिल्लीतील आपले राजकीय स्थान अधिक मजबूत करण्यासाठी हालचाली सुरू केल्याची चर्चा सध्या राजकीय वर्तुळात रंगली आहे. त्यातूनच शिंदे यांच्या कथित 'ऑपरेशन टायगर'ची चर्चा जोर धरत असतानाच शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी रविवारी मुंबईतील मातोश्री निवासस्थानी पक्षाच्या सर्व खासदारांची महत्त्वपूर्ण बैठक बोलावली आहे.

या बैठकीसाठी दिल्लीसह विविध ठिकाणी असलेल्या खासदारांना तातडीने मुंबईत हजर राहण्याचे निर्देश देण्यात आल्याची माहिती आहे. मात्र, या बैठकीपूर्वीच शिर्डी लोकसभा मतदारसंघाचे खासदार भाऊसाहेब वाकचौरे संपर्काबाहेर असल्याची माहिती समोर आली आहे. सकाळपासून त्यांचा मोबाईल फोन बंद असल्याने राजकीय वर्तुळात विविध चर्चांना उधाण आले आहे.

दरम्यान, वाकचौरे हे गेल्या दोन दिवसांपासून कुटुंबासमवेत बाहेरगावी असल्याचे सांगितले जात आहे. त्यांच्या निवासस्थानीही सध्या कोणी नसल्याची माहिती मिळत आहे. तसेच त्यांचे स्वीय सहाय्यकही त्यांच्यासोबत नसल्याने ते नेमके कुठे आहेत आणि त्यांच्याशी संपर्क का होत नाही, याबाबत अद्याप स्पष्ट माहिती समोर आलेली नाही.

त्यामुळे आज मातोश्रीवर होणाऱ्या बैठकीला वाकचौरे उपस्थित राहणार की नाही, याबाबत उत्सुकता निर्माण झाली आहे. दुसरीकडे, ठाकरे गटातील काही खासदार हे एकनाथ शिंदे यांच्या संपर्कात असल्याच्या चर्चांनाही राजकीय वर्तुळात जोर आला आहे. याच पार्श्वभूमीवर उद्धव ठाकरे यांनी बोलावलेल्या बैठकीला पक्षातील कोणते खासदार हजेरी लावणार आणि ठाकरे यांना कोणता कानमंत्र देणार याकडे सर्वांच्या नजरा लागल्या आहेत.