Nashik MLC Election : गोकुळ गितेंनी शड्डू ठोकल्यानं नाशिक विधानपरिषदेचं गणित बदललं; निवडणुकीतून माघार घेणाऱ्या मविआचे महत्व वाढले

Nashik MLC Election : नाशिक विधान परिषद निवडणुकीत भाजपचे बंडखोर उमेदवार गोकुळ गिते व प्रसाद हिरे दोघांनी माघार न घेता आपली उमेदवारी कायम ठेवल्याने तिरंगी लढत होणार आहे. बंडखोरांनी आपली बंडखोरी कायम ठेवल्याने नाशिक विधानपरिषदेची गणित बदलले आहे.

गोकुळ गिते यांनी आपली अपक्ष उमेदवारी कायम ठेवल्याने महायुतीचे अधिकृत उमेदवार असलेल्या शिवसेनेच्या नरेंद्र दराडे यांच्यापुढे तगडे आव्हान निर्माण झाले आहे. याशिवाय दुसरे अपक्ष उमेदवार प्रसाद हिरे हे देखील भाजपचे असल्याने महायुतीच्या मतांचे विभाजन होण्याची दाट शक्यता निर्माण झाली आहे. त्यामुळे महायुतीचे अधिकृत उमेदवार नरेंद्र दराडे यांची चिंता वाढली आहे. वरवर सोपी वाटणारी निवडणूक त्यांच्यासाठी आता अवघड झाली आहे.

त्यामुळे आता महायुतीच्या मतदारांसह महाविकास आघाडी व अपक्षांचे महत्त्व वाढले आहे. महाविकास आघाडीच्या जागावाटपात नाशिकची जागा शिवसेना उद्धव बाळासाहेब ठाकरे पक्षाच्या वाट्याला गेली होती. पक्षाने माजी आमदार अनिल कदम यांची उमेदवारी जाहीर केली होती. मात्र, कदम यांनी उमेदवारी अर्जच भरला नाही. माजी आमदार वसंत गिते यांनीही अर्ज घेतला होता, त्यांनीही भरला नाही. ठाकरे गटाने पुरेसे संख्याबळ नसल्याने व कथित घोडेबाजार होणार असल्याचे सांगत या निवडणुकीतून माघार घेत असल्याचे जाहीर केले.

सुरुवातीला महायुतीतील भाजप १८८, शिवसेना १७१ व राष्ट्रवादी काँग्रेसकडे १०७ मतदान असल्याने शिवसेनेचे नरेंद्र दराडे सहज निवडून येईल असे चित्र होते. परंतु भाजपचे गोकुळ गिते व प्रसाद हिरे यांनी उमेदवारी कायम ठेवल्याने आता मविआचे महत्व वाढले आहे. मविआचे तीन्ही पक्ष मिळून जवळपास शंभरच्या आसपास मतदान आहे. मविआने कोणाला मतदान करावे याबाबत अद्याप भूमिका स्पष्ट केली नाही. परंतु तिरंगी लढतीमुळे मविआच्या नगरसेवकांच्या आशा पल्लवित झाल्या आहेत.

मविआसह मालेगाव महापालिकेतील इस्लाम पार्टी व एमआयएमच्या नगरसेवकांचे देखील महत्त्व आता वाढले आहे. मविआ व मालेगावमधील नगरसेवकांचा कौल आता निर्णायक ठरणार आहे. सुरुवातीला निवडणुकीतून माघार घेतल्यानंतर पश्चातापाची भावना निर्माण झालेल्या मविआच्या तिरंगी लढत लागल्याचे पाहाता आता काहीशी सकारत्मकता निर्माण झाली आहे. याशिवाय महायुतीमधील घटक पक्ष असलेल्या राष्ट्रवादीकडे १०७ मतदान आहे. त्यामुळे राष्ट्रवादीचे नगरसेवक किंगमेकर ठरणार आहेत. राष्ट्रवादीचे गोरख बोडके व विष्णुपंत म्हैसधुणे दोघांनी निवडणुकीतून माघार घेतली.