Kishor Patil : आमदार किशोर पाटलांना भाजपवर भरोसा का नाही? कुठे झाला दगाफटका..?

Jalgaon Politics : जळगावच्या पाचोरा -भडगाव मतदारसंघात शिवसेना (शिंदे गट) आमदार किशोर पाटील यांनी स्वबळाचा नारा दिला आहे. माझ्या मतदारसंघात युती होणार नाही, शिवसेना सर्व स्थानिक स्वराज्य संस्थांवर एकटी लढेल अशी घोषणा त्यांनी केली आहे. भाजपचे नेते जरी युतीबद्दल बोलत असले तरी ते कधी पलटी खातली याचा भरोसा नाही असा हल्लाबोल त्यांनी केला आहे.

स्थानिक स्वराज्य संस्थांच्या निवडणुकांमध्ये कदाचित महाराष्ट्रात सर्वात आधी स्वबळाचा नारा देणारे किशोर पाटील हे पहिले असतील. त्यांनी शिवसेना (शिंदे) प्रमुख एकनाथ शिंदे किंवा पालकमंत्री गुलाबराव पाटील यांना न विचारताच आपल्या मतदारसंघात स्वबळाची घोषणा करुन टाकली. कोणत्याही परिस्थिती भाजप सोबत युती करायची नाही अशी भूमिका त्यांनी घेतली आहे. त्यामुळे जळगावात महायुतीमधील संबंध अधिक ताणले गेले आहेत.

पाचोऱ्यात निर्धार मेळाव्यात बोलताना किशोर पाटलांनी आपली खदखद बोलून दाखवली. महायुती सराकारकडून आमदारांना एक फुटकी कवडीही मिळाली नाही असं म्हणत त्यांनी भाजपला घरचा आहेर दिला. लोकसभेला आम्ही शिवसेनेच्या पाचही आमदारांनी भाजपच्या उमेदवारांचे काम केले. ते निवडून देखील आले. पण विधानसभेला माझ्या मतदारसंघात बंडखोरी झाल्याची खदखद त्यांनी व्यक्त केली.

विधानसभेच्या निवडणुकीपूर्वीच भाजपचे मंत्री गिरीश महाजन व किशोर पाटील यांच्यातील सु्प्त संघर्ष दिसून आला होता. विधानसभा निवडणुकीत भाजपचे बंडखोर उमेदवार अमोल शिंदे यांना गिरीश महाजन यांनी छुपी मदत केल्याचा आरोप किशोर पाटील यांनी केला होता. महायुती धर्म न पाळणाऱ्या बंडखोरांवर कारवाई करण्याऐवजी जिल्हा परिषद निवडणुकीपूर्वी अमोल शिंदेंचा भाजपात प्रवेश झाला. तो किशोर पाटलांच्या जखमेवर मीठ चोळणारा ठरला.

तसेच ठाकरे शिवसेनेच्या उमेदवार वैशाली सूर्यवंशी व राष्ट्रवादी शरचंद्र पवार पक्षाचे उमेदवार दिलीप वाघ यांनाही भाजपने पक्षात घेतले. त्यामुळे किशोर पाटलांच्या सर्वच विरोधकांना भाजप बळ देत असल्याचे चित्र आहे. याच रागातून किशोर पाटलांनी कुठल्याही परिस्थिती आपल्या मतदारसंघात युती न करण्याचा निर्णय घेतला आहे. शिवाय वरिष्ठ नेत्यांनीही माझ्या मतदारसंघात युतीचा आग्रह धरु नये असा संदेश त्यांनी दिला आहे.