Sudhakar Badgujar Politics: सुधाकर बडगुजर यांना 'तो' फोटो नडला, पक्षाकडून थेट बडतर्फीच झाली!

Sudhakar Badgujar Expelled: शिवसेनेचे उपनेते सुधाकर बडगुजर गेल्या दोन दिवसांपासून सातत्याने चर्चेचा विषय आहेत. शिवसेना उद्धव ठाकरे पक्षातून त्यांची हकालपट्टी झाली आहे. हकालपट्टी का झाली? याचे कारण आता स्पष्ट झाले आहे. त्याची माहिती खुद्द श्री बडगुजर यांनीच दिली.

शिवसेना उपनेते सुधाकर बडगुजर यांनी आपण पक्षात नाराज आहोत. पक्षाच्या जिल्हाप्रमुख आणि अन्य नियुक्त्यांबाबत त्यांचे नाराजी होती. त्याविषयी त्यांनी जाहीरपणे विधान केल्याने तो चर्चेचा विषय ठरला. विशेष म्हणजे त्यांनी आपल्या सोबत दहा ते बारा जण नाराज असल्याचे सूचक विधान केले होते.

या विधानानंतर शिवसेनेची स्थानिक आणि वरिष्ठ यंत्रणा सक्रिय झाली. शिवसेना नेते संजय राऊत दौऱ्यावर असतानाच काही घडामोडी घडल्या. श्री बडगुजर यांनी महापालिका कर्मचारी सेनेचे अध्यक्ष म्हणून काही प्रश्नाबाबत मुख्यमंत्री देवेंद्र फडणवीस यांची भेट घेतली. ही भेट त्यांच्या बडतर्फीची तात्कालिक कारण ठरले. मात्र वास्तव काही वेगळेच आहे.

मात्र श्री. बडगुजर यांच्या बडतर्फीला वेगळेच कारण आहे. शिवसेनेचे महानगर प्रमुख विलास शिंदे यांच्या कन्येच्या विवाहात जलसंपदा मंत्री गिरीश महाजन उपस्थित होते. त्याआधी मंत्री महाजन यांनी शिवसेना पक्षप्रमुख यांनाच आव्हान देत, येत्या आठ दिवसात उद्धव ठाकरे यांची शिवसेना समोर नष्ट करून टाकू, असे विधान केले होते. मंत्री महाजन यांचे हे विधान शिवसेनेच्या वरिष्ठ नेत्यांनी गांभीर्याने घेतले.

शिवसेनेचे महानगरप्रमुख विलास शिंदे यांच्या कन्येच्या विवाहात शिवसेनेला समोर नष्ट करण्याची भाषा करणाऱ्या मंत्री महाजन यांच्या शेजारी उभे राहून श्री. बडगुजर यांनी फोटो काढला. हा फोटो काढणे संजय राऊत आणि वरिष्ठ नेत्यांच्या डोळ्यात खुपला. जो विरोधक शिवसेना मुळापासून नष्ट करण्याची भाषा करतो, त्याच्याबरोबर फोटो कसा काढला?. याबाबत बडगुजर यांना तातडीने विचारणा करण्यात आली.

त्यानंतर शिवसेना उद्धव ठाकरे पक्षाच्या स्थानिक नेत्यांची पत्रकार परिषद नाशिकला झाली. यावेळी श्री बडगुजर जळगावला होते. मात्र पत्रकार परिषदेला त्यांच्या अनुपस्थितीने आगीत तेल ओतले. त्यातून वेगळाच राजकीय वास आला. त्याचवेळी मुंबईत संजय राऊत यांची पत्रकार परिषद सुरू होती. त्यात देखील बडगुजर यांच्या विषयी विचारणा झाली. त्यामुळेच बडगुजर यांची पक्षातून तडका फडकी हकालपट्टी झाली.

श्री. बडगुजर यांनी जो फोटो काढला त्यावेळेस शिवसेनेचे खासदार अरविंद सावंत देखील त्या कार्यक्रमात उपस्थित होते. मात्र खासदार सावंत यांनी मंत्री महाजन यांच्यापासून अंतर राखले होते. खासदार सावंत यांची राजकीय भूमिका सातत्याने शिवसेनेची एकनिष्ठ राहिली आहे. त्यामुळे बडगुजर यांचे हकालपट्टी का झाली? याचे खरे कारण पुढे आले आहे.

श्री बडगुजर यांनी आपण पक्षविरोधी कोणतेही काम आजपर्यंत केलेले नाही. नाराजी व्यक्त करणे हा जर गुन्हा असेल, तर तो मी केला आहे. त्याची शिक्षा पक्षातून बडतर्फी असेल, तर ती देखील मला मान्य आहे, असे म्हटले आहे.

-------