Nagpur News : नगरपालिकेच्या निवडणुकीत भाजपने सर्वाधिक जागा जिंकल्या. राज्यातील सर्वात मोठा पक्ष म्हणून भाजपचा उदय झाला आहे. असे असताना चंद्रपूर जिल्ह्यात मात्र भाजपला मोठा धक्का बसला. येथे फक्त दोनच जागेवर भाजपला समाधान मानावे लागले. या निकालावरून भाजपचे ज्येष्ठ नेते आणि माजी मंत्री सुधीर मुनगंटीवार यांनी पुन्हा एकदा पक्षावर राग काढून मंत्रिपद नाकारल्याचा हा परिणाम असल्याचे सूचित केले. एवढेच नव्हे तर पक्षाने माझी शक्ती कमी केली असे सांगून अप्रत्यक्षपणे मुख्यमंत्री देवेंद्र फडणवीस यांना टार्गेट केले होते. दुसऱ्याच दिवशी मात्र त्यांनी मुख्यमंत्री देवेंद्र फडणवीस यांची भेट घेऊन चंद्रपूर जिल्ह्याच्या विकासासाठी एक निवेदन दिले. निवेदनाचा फोटो सर्वत्र प्रसारित झाला असून त्यात दोघांचेही चेहरे खुलले असल्याचे दिसून येते. त्यामुळे या दोन नेत्यांमध्ये नेमकी काय चर्चा झाली याचीच चर्चा सध्या सर्वत्र सुरू आहे.
मिळेल तेव्हा ते आपली भडास काढतात. हिवाळी अधिवेशनात तर मंत्रीच नव्हे तर चंद्रपूर जिल्ह्यातील भाजप आमदारालाच घेरले होते. या संपूर्ण अधिवेशन मुनगंटीवार यांनी विरोधी पक्षनेत्याची भूमिका बजावली. सातत्याने पक्षनेतृत्वाला टार्गेट करीत असल्याने सुधीरभाऊंचा एकनाथ खडसे होण्याचा धोका वर्तविला जात आहे.
नगरपालिकेच्या निकालानंतर त्यांनी मुख्यमंत्र्यांवर बोचरी टीका केली. काँग्रेस (Congress) आपल्या नेत्यांना शक्ती देत आहे तर आमचे नेते शक्ती कमी करीत असल्याचा आरोप त्यांनी केला होता. याची चांगलीच चर्चा राजकीय वर्तुळात रंगली आहे. सुधीर मुनगंटीवार यांना मंत्रिमंडळातून का वगळले? याबाबत नेहमीच तर्कवितर्क व्यक्त केले जाते. ते केंद्रीयमंत्री नितीन गडकरी यांचे समर्थक असल्याने दिल्लीतूनच तसा आदेश असल्याचा दावा केला जात आहे.
दुसरीकडे देवेंद्र फडणवीस (Devendra fadnavis) यांच्याऐवजी नितीन गडकरी यांना मुख्यमंत्री करण्याची मागणी त्यांनी केली होती. काही आमदारांना घेऊन ते विशेष विमानाने नागपूरमध्ये आले होते. याचाही राग पक्षाला असल्याचे बोलले जाते. मात्र ज्यावेळी फडणवीस सर्वप्रथम मुख्यमंत्री झाले तेव्हा ते त्यांच्या मंत्रिमंडळात अर्थमंत्री होते.
अडीच वर्षांच्या महायुतीच्या काळात वन आणि सांस्कृतिक असे दोन खाते त्यांच्याकडे देण्यात आले होते. सध्या आज घडीला भाजपच्या सर्वाधिक अनुभवी, अभ्यासू आणि कार्यक्षम नेत्यांमध्ये त्यांचा समावेश होतो. त्यानंतरही डावलल्याने सुधीर मुनगंटीवार यांचा राग सहाजिक आहे असे त्यांच्या समर्थकांचे म्हणणे आहे. आता मुख्यमंत्री फडणवीस यांच्या भेटीनंतर पुन्हा एकदा मुनगंटीवार यांच्या मंत्रिमंडळातील वापसीची चर्चा सुरू झाली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.