Local Body Elections : मुख्यमंत्र्यांना भिडणाऱ्या नेत्याला आरक्षणाचा फटका; भाजपला सर करता आला नाही 'हा' बालेकिल्ला...

Nagpur Municipal Election Reservation Announced : सुमारे 25 वर्षांपासून काँग्रेसचा बालेकिल्ला सांभाळून ठेवणारे काँग्रेसचे राष्ट्रीय सचिव तसेच ज्येष्ठ नगरसेवक प्रफुल्ल गुडधे यांना नागपूर महापालिकेच्या आरक्षण सोडतीचा मोठा धक्का बसला आहे. त्यांचा 38 क्रमांकाचा जयताळा प्रभागातील तीनही जागा महिलांसाठी आरक्षित झाल्या आहे. गुडधे यांचा बालेकिल्ला आजवर भाजपला सर करता आला नाही.

मागील निवडणुकीत भाजपचे 108 नगरसेवक निवडून आले होते. मोठमोठे काँग्रेसचे नेते पराभूत झाले होते. मात्र जयताळा प्रभागातून तीनही उमेदवार काँग्रेसचे निवडून आले होते. यात प्रफुल्ल गुडधे यांच्यासह उज्ज्वला बनकर आणि प्रणिता शहाणे यांचा समावेश होता. विशेष म्हणजे मुख्यमंत्री देवेंद्र फडणवीस यांच्या दक्षिण-पश्चिम नागपूर विधानसभा मतदारसंगात जयताळा प्रभाग येतो.

फडणवीस आणि गुडधे यांनी यापूर्वी दोन वेळा विधानसभेची निवडणूक एकमेकांच्या विरोधात लढवली आहे. विधानसभेत गुडधे यांना दक्षिण-पश्चिम नागपूर कधीच जिंकता आले नाही, त्याच प्रमाणे भाजपला महापालिकेच्या निवडणुकीत गुडधे यांना पराभूत करता आले नाही. गुडधे नागपूर महापालिकेत काँग्रेसचे गटनेते होते. अभ्यासू नगरसेवक आणि देवेंद्र फडणवीस यांचे कट्टर विरोधक अशी त्यांची ओळख आहे.

आमदार नसतानाही विधानसभेच्या निवडणुकीपूर्वी राहुल गांधी यांना मोठी बढती दिली. काँग्रेसच्या राष्ट्रीय कार्यकारिणीत स्थान दिले आहे. हरियाणा राज्याची जबाबदारी त्यांच्यावर सोपवली आहे. मात्र आरक्षणामुळे आता यंदा त्यांना महापालिकेची निवडणूकसुद्धा लढता येणार नाही. तीन महिलांसाठी राखीव असलेल्या जयताळा प्रभागात आता गुडधे यांच्या जागी काँग्रेसला नवा उमेदवार शोधावा लागणार आहे.

निवडणुकीआधीच काँग्रेस या प्रभागात आरक्षण सोडतीमुळे बॅकफूटवर गेली आहे. त्यामुळे आता गुडधे पुन्हा हा प्रभाग काँग्रेसला मिळवून देण्यासाठी कोणता हुकमी एक्का बाहेर काढणार, याबाबत उत्सुकता वाढली आहे. तर दुसरीकडे भाजपलाही हा प्रभाग काबीज करण्याची संधी आयती चालून आली आहे. त्यामुळे यंदाची या प्रभागातील निवडणूक चुरशीची होणार, हे स्पष्ट आहे.