
Nagpur News : गोंदिया जिल्हा मध्यवर्ती बँकेच्या निवडणुकीवरून काँग्रेसचे माजी प्रदेशाध्यक्ष नाना पटोले आणि राष्ट्रवादी काँग्रेसचे राष्ट्रीय कार्याध्यक्ष प्रफुल पटेल तसेच भाजपचे आमदार परिणय फुके यांच्यात खडाजंगीला सुरुवात झाली आहे. पटेल आणि फुके सातत्याने नाना पटोले यांना टार्गेट करीत आहेत, याचा खरपूस समाचार नाना पटोले यांनी घेतला. त्यांनी पटोले आणि फुके यांना उद्देशून मी मागच्या दाराने निवडून जात नाही, अशा शब्दांत सुनावले तसेच मला बोलायला लावू नका, असा इशारा फुके यांना दिला. यावर आता महायुतीचे नेते काय बोलतात, प्रत्युत्तर देतात याकडे सर्वांचे लक्ष लागले आहे.
गोंदिया-भंडारा जिल्ह्यात पटोले आणि पटेल असा राजकीय वाद आहे. दोघेही नेते एकमेकांवर कुरघोडी करण्याची एकही संधी सोडत नाहीत. लोकसभेच्या निवडणुकीत पटेल यांचा पराभव पटोले यांनी केला होता. त्यानंतर दोघांमधील वाद आणखीच वाढला आहे. नाना पटोले (Nana Patole) यांच्या पराभवासाठी भाजपने परिणय फुके यांना भंडाऱ्यात पाठवले होते. ती निवडणूक चांगलीच गाजली होती. फुके निवडून येतील, अशी परिस्थिती निर्माण झाली असताना मतदानाच्या दोन दिवसांपूर्वी पैसे वाटपावर चांगलाच वाद झाला होता. तो नाना पटोले यांच्या पथ्यावर पडला.
2024 च्या निवडणुकीत भाजपने (BJP) पुन्हा एकदा नाना पटोले यांना घेरण्याची पूर्ण तयारी केली होती. यावेळी त्यांच्यासोबत पटेल हेसुद्धा होते. हे बघता पटोले यांचा पराभव निश्चित मानला जात होता. भाजपने यासाठी मोठी तडजोड केली होती. परिणय फुके यांना थांबवले. राष्ट्रवादी काँग्रेसमधून उमेदवार आयात केला.
ही निवडणूक अतिशय अटीतटीची झाली होती. ईव्हीएमध्ये भाजप महायुतीचा उमेदवार जिंकला होता. मात्र, टपाल तिकीटांच्या मोजणीत नाना पटोले जिंकून आले. नानांना पराभूत करण्याची आलेली संधी गमावल्याने खंत आजही भाजपचे कार्यकर्ते व्यक्त करीत आहेत. जिल्हा मध्यवर्ती बँकेच्या निवडणुकीवरून पुन्हा एकदा नेत्यांमध्ये वादाला तोंड फुटले आहे.
पटेल, फुके यांच्या आरोपांना उत्तर देताना नाना पटोले म्हणाले, 'मी चिल्लर नाही, मागच्या दाराने निवडून येत नाही. माझ्याकडे संजय राऊत यांच्यापेक्षा जास्त माहिती आहे, त्यामुळे माझ्याबाबत बोलताना सांभाळून बोला, सन्माजनक शब्द वापरा.' असा इशाराच त्यांनी दोघांना दिला आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.