NCP Politics : राष्ट्रवादीचं ठरलंय! युतीचं डोक्यातून काढून टाका अन् जिथे आपली ताकद तिथे उमेदवार द्या...

Bhandara News, 17 Aug : आगामी स्थानिक स्वराज्य संस्थांच्या निवडणुकीसाठी सर्वच पक्षांनी रणशिंग फुंकलं आहे. तर या निवडणुकीतही विधानसभेप्रमाणे महायुती एकत्र लढणार असल्याचं वरिष्ठांकडून सांगितलं जात आहे.

मात्र, अजित पवारांच्या राष्ट्रवादीचे खासदार प्रफुल पटेल यांनी मात्र, कार्यकर्त्यांना युतीचं डोक्यातून काढून टाका, असं सांगितलं आहे. प्रफुल पटेल हे भंडारा दौऱ्यावर असताना त्यांनी हे वक्तव्य केलं आहे.

त्यांच्या वक्तव्यामुळे आता महायुती स्थानिकच्या निवडणुकांना एकत्रित सामोरं जाणार की वेगळं लढणार याबाबत संभ्रम निर्माण झाला आहे. पटेल यांनी स्थानिक स्वराज्य संस्थांच्या निवडणुकीच्या पार्श्वभूमीवर भंडाऱ्यातील कार्यकर्ते आणि पदाधिकाऱ्यांना मार्गदर्शन केलं.

यावेळी बोलताना ते म्हणाले, स्थानिक स्वराज्य संस्थांच्या निवडणुकीमध्ये जिथं युती होईल तिथेच युती करायची असं आमचं धोरण आहे. त्यामुळे युतीचं डोक्यातून काढून टाका. युती कुठे कुठे करणार ज्या प्रभागात आपल्याकडे सक्षम उमेदवार असेल दुसऱ्याकडे असेल, आता तीन पक्ष आहेत त्यामुळे तिसऱ्याकडेही उमेदवार राहू शकतो.

अशा परिस्थितीत आपण आपल्या कार्यकर्त्याला संधी नं देणं त्याचं मन दुखवणं, हे योग्य वाटतं नाही. त्यामुळे जिथे सोयीचं वाटत असेल आपण तिथे बघू, असं म्हणत त्यांनी जिथे राष्ट्रवादीची ताकद आहे तिथे युती न करण्याचे संकेत दिले आहेत.

शिवाय सार्वत्रिक निवडणुकीत मतांचा विचार असतो जिथे आपली ताकद आहे तिथं आपण विचार केलाचं पाहिजे. मागील वेळी तिथे कोणी दुसऱ्या पक्षाचा निवडून आला म्हणून त्यालाच जागा सोडायची, असं होत नाही. तिथं आपली ताकत असेल तर आपण लढायचं.

त्यामुळे आपणच प्रत्येक प्रभागात आपलाच उमेदवार निवडणूक लढेल या विचारांनाच प्रत्येकाने आता कामाला लागलं पाहिजे, आपण निष्काळजी राहणार नाहीत याची काळजी घ्या अशा सूचना खासदार प्रफुल पटेल यांनी दिल्या आहेत. त्यामुळे आता युतीतील इतर पक्षातील नेते यावर काय प्रतिक्रिया देणार हे पाहणं महत्वाचं ठरणार आहे.