मोठी बातमी : जिल्हा परिषद अध्यक्ष निवडीचा मुहूर्त ठरला; ग्रामविकास विभागाकडून तारीख घोषित; राजकीय घडामोडींना वेग

Maharashtra Gram Vikas Department Order : राज्यातील १२ जिल्हा परिषद आणि त्या अंतर्गत येणाऱ्या १२५ पंचायत समितीच्या निवडणुका पार पडल्या. पण २ आठवडे उलटल्यानंतरही जिल्हा परिषदेचा अध्यक्ष, उपाध्यक्ष आणि पंचायत समितीच्या सभापतीची निवड अद्याप झालेली नाही. त्यामुळे सर्वांच्या नजरा या अध्यक्ष निवडीकडे लावून राहिल्या होत्या.

अखेर बुधवारी (ता. 25) राज्याच्या ग्रामविकास विभागाने याबाबतचे परिपत्रक जारी कले असून १२ जिल्हा परिषद व पंचायत समितींना २० मार्चपूर्वी अध्यक्ष, उपाध्यक्ष निवड करण्यासाठी बैठक घ्यावी अशा सूचना अवर सचिव बा.म. आसोले यांनी दिल्या आहेत.

राज्यातील सिंधुदुर्ग, रत्नागिरी, रायगड, पुणे, सातारा, सांगली, कोल्हापूर, सोलापूर, छत्रपती संभाजीनगर, लातूर आणि परभणी या १२ जिल्हा परिषद आणि इथल्या १२५ पंचायत समितीच्या निवडणुका ७ फेब्रुवारी रोजी पार पडल्या होत्या. ९ फेब्रुवारी रोजी याचा निकाल जाहीर झाला. पण जिल्हा परिषदेचा अध्यक्ष, उपाध्यक्ष आणि पंचायत समितीच्या सभापती पदाची निवड कधी होणार याची उत्कंठा सर्वांना लागली होती.

अखेर ग्रामविकास विभागाकडून आज (ता. २५) सर्वच जिल्हा परिषदेला २० मार्चपूर्वी सर्व पदाधिकारी निवड प्रक्रिया पूर्ण करण्याच्या सूचना दिल्या आहेत.

कोल्हापूर महानगरपालिकेमध्ये तालुकास्तरावर महायुती काही ठिकाणी स्वतंत्र लढली होती. तर सांगलीमध्येही महायुती काही ठिकाणी घटक पक्षांच्या विरोधात होती. मात्र निवडणूक पार पडल्यानंतर कोल्हापुरात महायुतीचे सर्वच नेते एकत्र येत सत्ता स्थापनेचा दावा केला आहे. सर्वाधिक जागा राष्ट्रवादी काँग्रेसने मिळवल्यानंतर राष्ट्रवादी काँग्रेसचा पहिला अध्यक्ष कोल्हापूर जिल्हा परिषदेवर होईल असा अंदाज व्यक्त केला जात असताना भाजपने देखील अध्यक्षपदावर दावा केला आहे. तर सांगलीमध्ये भाजपला वगळूनच राष्ट्रवादी आणि राष्ट्रवादी काँग्रेस शरदचंद्र पवार पक्ष आणि शिवसेना एकत्र येत सत्ता स्थापन करण्याच्या तयारीत आहे.