NCP Politic's : शरद पवारांच्या शिष्याचा अजितदादांवर गंभीर आरोप; म्हणाले, ‘माझं राजकारण संपवण्याची...’

Mumbai, 13 February : माझ्या मुंब्रा-कळवा मतदारसंघात दुसरं कोण ढवळाढवळ करणार..? अजित पवार. त्यांना फारच हौस आहे...माझं राजकारण संपवण्याची!, असा आरोप करून आमदार जितेंद्र आव्हाड यांनी ‘माझ्या विरोधातील उमेदवाराला अजित पवार यांनी कशात कशात मदत केली आहे, हे मी विधानसभेत सांगणार आहे’ असा गर्भित इशाराही दिला. त्यामुळे आव्हाड विरोध अजित पवार संघर्ष आगामी काळात वाढण्याची शक्यता आहे.

मुंबईत माध्यमांशी बोलताना आमदार जितेंद्र आव्हाड (Jitendra Awhad) यांनी उपमुख्यमंत्री अजित पवार यांच्यावर पुन्हा एकदा आगपाखड केली. विधानसभा निवडणुकीत माझ्या विरोधात जो उमेदवार (नजीब मुल्ला) उभा होता. त्याला अगोदर निधी देण्यात आला. मग त्यानंतर त्याला सर्व प्रकारची ताकद देण्यात आली. आतापर्यंत त्याला सगळीकडून फक्त अजित पवार यांनीच मदत केली आहे. त्याबाबत मी विधानसभेत सविस्तर बोलणार आहे, असेही आव्हाड यांनी स्पष्ट केले.

उपमुख्यमंत्री अजित पवार (Ajit Pawar) यांनी २०१९ मध्ये जेव्हा देवेंद्र फडणवीस यांच्यासोबत जाऊन पहाटे शपथ घेतली होती, त्या वेळी वायसीएम सेंटरच्या बाहेर जोरदार घोषणाबाजी झाली होती. त्या वेळी जितेंद्र आव्हाड यांनी अजित पवार मुर्दाबादच्या घोषणा दिल्या होत्या. तसेच इतरही काही सहकाऱ्यांनी घोषणाबाजी केली होती. त्याचा राग आव्हाड यांच्यावर अजित पवार यांचा असल्याचे सांगण्यात येते. एकत्र राष्ट्रवादीतही दोघांचा पटत नव्हते, हे अनेकदा दिसून आलेले आहे.

पोलिस गुन्ह्यांसंदर्भात जितेंद्र आव्हाड म्हणाले, ठाण्यात मला संपवण्याचे प्रयत्न कोण करत असतील. माझ्यावर गुन्हे कसं दाखल झाले. एक बाई माझ्यापासून अंतरावर होती. मी तिला सांगितले की, पुढे जाऊ नको, पुढे गर्दी आहे, टेप आहे. तेवढ्यावरून माझ्यावर ३५४ गुन्हा दाखल झाला.

जामिनीसाठी मी न्यायालयात गेल्यावर न्यायाधीश विचारतात, ‘ही केस कशी काय होऊ शकते.’ अशा माझ्यावर जेवढ्या केसेस झाल्या आहेत, त्यावरील सर्व सुनावणीत न्यायाधीश सांगतात की ‘दिस इज नो केस’आणि प्रकरण फेकून देतात. तुम्ही पोलिस मॅनेज करू शकता; पण कोर्ट मॅनेज करू शकत नाही, असेही आव्हाड यांनी स्पष्ट केले.

माझ्यावरील एका केसचा उच्च न्यायालयाने माझ्या बाजूने निकाल दिला होता. त्या विरोधात सर्वोच्च न्यायालयात चार मोठे वकिल (ज्यांची ५० लाख रुपये खर्च असतो) नेमून केस उभी करण्यात आली. त्याचाही निकाल आला. त्या निकालाच्या विसंगत अशी माझी पोलिस चौकशी झाली. हे मी विधानसभेत सगळं काढणार आहे. कसं एका हवालदाराला सांगण्यात आलं की, ‘तुझ्या बायकोला आण, दाखवतो. नाही तर दे स्टेटमेंट’ हे मी सर्व विधानसभेत मांडणार आहे, असेही आव्हाड यांनी स्पष्ट केले.