Deenanath Hospital : भिसे कुटुंबियांकडे 10 लाख मागणाऱ्या डॉक्टरांचा राजीनामा; 2 कारणांच्या आधारे घेतला मोठा निर्णय

Deenanath Hospital News : पुणे : तनिषा भिसे मृत्यू प्रकरणी प्राथमिक अहवालात दोषी आढळल्यानंतर दीनानाथ मंगेशकर रुग्णालयाच्या डॉ. सुश्रृत घैसास यांनी राजीनामा दिला आहे. त्यांनी त्यांचा राजीनामा रुग्णालय प्रशासनाकडे सुपूर्द केला आहे. रुग्णालयाची होणारी बदनामी आणि रुग्णांची होत असलेली गैरसोय पाहता राजीनामा देत असल्याचे घैसास यांनी सांगितले.

भिसे कुटुंबियांकडे 10 लाख रुपयांच्या अनामत रक्कमेची मागणी केल्याप्रकरणी आणि पाच तास उपचारासाठी थांबवून ठेवल्याचा ठपका घैसास यांच्यावर चौकशी अहवालात ठेवण्यात आला होता. त्यानंतर हॉस्पिटल प्रशासन आणि डॉ. घैसास यांच्यावर चुहूबाजूंनी टीकेची झोड उठली होती. हॉस्पिटलची हीच बदनामी थांबविण्यासाठी घैसास यांनी राजीनाम्याचा निर्णय घेतला.

राज्य सरकारच्या चौकशी अहवालात काय?

तनिषा भिसे मृत्यू प्रकरणाची चौकशी करण्यासाठी राज्य सरकारने डॉ. राधाकृष्ण यांच्या अध्यक्षतेखाली समिती नेमली होती. या समितीने आज आपला अहवाल सादर केला. यात भिसेंच्या मृत्यूला रुग्णालयच जबाबदार असल्याचा ठपका ठेवण्यात आला आहे. सकाळी नऊ वाजता रुग्णालयात दाखल झालेल्या तनिषाला रक्तस्त्राव होत असताना देखील तब्बल पाच तास थांबवून घेतले पण उपचार केला नाही. तसेच रुग्णालयाकडून डिपाॅझिट म्हणून 10 लाखांची मागणी केली असल्याचे देखील अहवालातून उघड झाले आहे.

याबाबत महिला आयोगाच्या अध्यक्षा रुपाली चाकणकर म्हणाल्या, अहवालामध्ये रुग्ण सकाळी 9 वाजून 1 मिनिटाने रुग्णालयात दाखल झाला. तिच्या ऑपरेशनची देखील तयारीही करण्यात आली होती. मात्र, रुग्णाला 10 लाखांचे डिपाॅझिट भरण्यास सांगितले. रुग्णाच्या नातेवाईकाईंनी काही रक्कम भरण्याची तयारी दाखवली होती. मात्र, रुग्णावर उपचार करण्यात आले नाहीत. रुग्णाला मोठ्या प्रमाणात रक्तस्त्राव होत असताना रुग्णालयाकडून कुठलेही उपचार करण्यात आले नाहीत.