Ajit Pawar on Vaishnavi Hagwane : वैष्णवी हगवणे प्रकरणावरून अजितदादा संतापले; ‘दोषी असेल तर फासावर लटकावा; पण नाहक बदनामी करू नका’

Pune, 22 May : उपमुख्यमंत्री अजित पवार यांच्या राष्ट्रवादी काँग्रेस पक्षाशी संबंधित असलेल्या राजेंद्र हगवणे यांच्या सुनेचा संशयास्पद मृत्यू झाला आहे. या प्रकरणातील संशयित आरोपींमध्ये राष्ट्रवादीच्या नेत्याचं नाव आल्याने पक्षाच्या भूमिकेबाबत प्रश्नचिन्ह उपस्थित करण्यात येत आहे. त्याच बरोबर उपमुख्यमंत्री अजित पवार यांच्यावर टीकाही होत आहे. त्या टीकेला उपमुख्यमंत्री अजित पवार यांनी उत्तर दिलं आहे.

बारामतीमधील एका कार्यक्रमात बोलताना उपमुख्यमंत्री अजित पवार (Ajit Pawar) म्हणाले, कार्यकर्ते म्हणून अनेक जण लग्नाला बोलावत असतात. शक्य असेल त्या लग्नाला मी जातो. मात्र, लग्नानंतर जर त्यांनी सुनेबद्दल वेडेवाकडं केलं, तर त्याला अजित पवार कसा जबाबदार असेल, सवाल त्यांनी केला आहे.

ही घटना घडल्यानंतर पिंपरी चिंचवडच्या पोलिस आयुक्तांना फोन करून दोषींवर कडक कारवाई करण्यास सांगितले आहे, त्यामुळे आत्महत्या केलेल्या वैष्णवी हगवणेचा (Vaishnavi Hagwane) नवरा, सासू आणि नणंद पोलिस कोठडीत आहेत. सासरा आणि दीर फरारी आहेत. मात्र, पळून पळून ते कुठे जाणार आहेत. मी पोलिसांना सांगितलं आहे की, तीन नाही तर सहा टीम करा. पण, जिथं असेल तिथून त्यांच्या मुसक्या आवळून आणा, असा सूचना मी पोलिसांना दिल्या आहेत.

वैष्णवी हगवणे आत्महत्या प्रकरणात माध्यमांमधून नाहक माझी बदनामी करण्यात येत आहे. राजकीय क्षेत्रात असल्यामुळे लोक प्रेमापोटी लग्नाला बोलावतात आणि त्यामुळे आम्हाला जावं लागतं. म्हणून त्यांनी जर त्यांच्या सुनेबाबत वेड वाकडे केलं तर त्याला अजित पवार कसा जबाबदार असेल, असंही त्यांनी म्हटलं आहे.

मी लाडक्या बहिणींना दीड हजार रुपये देण्याची सुरुवात केली. एकनाथ शिंदे, देवेंद्र फडणवीस आम्ही त्याबाबत निर्णय घेऊन लाडक्या बहिणींसाठी ही योजना सुरू केली. अनेक योजना आम्ही सरकारच्या माध्यमातून महिला भगिनींसाठी सुरू करत आहोत आणि दुसरीकडे, माध्यमांमध्ये माझी अशी बदनामी सुरू आहे. जर मी दोषी असेल तर थेट मला फासावर लटकवा. मात्र उगीचच माझी बदनामी करू नका, असे आवाहनही अजित पवार यांनी केले.

अजित पवार म्हणाले, एखाद्या लग्नात गेल्यानंतर मला जर कोणी गाडीची चावी देण्यास विनंती केली, तर ती द्यावे लागते. नाहीतर ते लोक नाराज होतात. वैष्णवीच्या लग्नामध्ये चावी देताना मी विचारलं होतं की ही स्वखुशीने देत आहात की बळजबरीने देत आहे. वैष्णवीच्या कुटुंबाला तेव्हा मी म्हटलंदेखील होतं, जर त्यांनी बळजबरीने घेतली असेल तर त्यांच्याकडे बघतो. मात्र, एवढं कडक वागूनही माझी बदनामी केली जात आहे.

राजेंद्र हगवणे हा माझ्या पक्षाचा पदाधिकारी नाही. मात्र, जर तो सदस्य जरी असेल तरी मी त्याला आजपासून माझ्या पक्षातून काढून टाकलं. त्याची हकालपट्टी केल्याचे जाहीर करतो. असली नालायक माणसं माझ्या पक्षात नको. गरिबांच्या दारात जाईन. मात्र, असल्या नालायक लोकांच्या दारात जाणार नाही, असंही अजित पवार म्हणाले. आता कुणाच्या लग्नाला गेलो तर अशी आफत येते, त्यामुळे कुणी लग्नाला नाही आलं तर नाराज व्हायचं नाही, अशी सूचनाही अजित पवारांनी कार्यकर्त्यांना केली.