पुणे पोलिसांनी मंतरवाडी येथील गोळीबार आणि खंडणी प्रकरणाचा तपास करताना मोठी कारवाई केली असून कुख्यात लॉरेन्स बिश्नोई गँगशी संबंधित एका संशयिताला राजस्थानमधून ताब्यात घेतले आहे. या कारवाईमुळे शहरात चर्चेत असलेल्या या प्रकरणाच्या तपासाला नवे वळण मिळाले आहे.
गुन्हे शाखेच्या पथकाने तांत्रिक तपास, मोबाईल लोकेशन आणि गुप्त माहितीच्या आधारे राजस्थानमधील हनुमानगड येथे धाड टाकून पवन राम या तरुणाला ताब्यात घेतले. सध्या त्याच्याकडे सखोल चौकशी सुरू असून या गुन्ह्यामागील मुख्य सूत्रधार आणि इतर साथीदारांबाबत माहिती गोळा केली जात आहे.
हे प्रकरण 18 जून रोजी समोर आले होते. फुरसुंगी परिसरातील मंतरवाडी येथे रात्री सुमारे 9 वाजण्याच्या सुमारास एका स्टील व्यावसायिकाच्या कार्यालयाबाहेर गोळीबार करण्यात आला होता. या घटनेनंतर परिसरात भीतीचे वातावरण निर्माण झाले होते. गोळीबाराचा उद्देश व्यावसायिकावर दबाव टाकण्याचा असल्याचा संशय पोलिसांनी व्यक्त केला होता.
तपासादरम्यान पोलिसांनी घटनास्थळावरील सीसीटीव्ही फुटेज ताब्यात घेतले. त्याचवेळी सोशल मीडियावर काही पोस्ट व्हायरल झाल्या होत्या. त्यामध्ये लॉरेन्स बिश्नोई गँगशी संबंधित व्यक्तींनी या हल्ल्याची जबाबदारी स्वीकारल्याचा दावा करण्यात आला होता. घटनेचा व्हिडिओही मोठ्या प्रमाणावर सोशल मीडियावर फिरत होता.
पोलिसांच्या माहितीनुसार, संबंधित स्टील व्यावसायिकाकडे तब्बल 5 कोटी रुपयांची खंडणी मागण्यात आली होती. एवढेच नाही तर त्याच्या इतर व्यावसायिक भागीदारांनाही मोठी रक्कम देण्याच्या धमक्या देण्यात आल्या होत्या. याप्रकरणी फुरसुंगी पोलीस ठाण्यात गुन्हा दाखल करण्यात आला आहे.
तपासादरम्यान गोळीबारासाठी वापरण्यात आलेली दुचाकी काही दिवसांतच सासवड परिसरातील एका निर्जन ठिकाणी आढळून आली. वाहनावरील ओळख पटवणारा क्रमांकही पुसून टाकण्याचा प्रयत्न करण्यात आला होता. मात्र पोलिसांनी विविध तांत्रिक पुरावे आणि गोपनीय माहितीच्या आधारे आरोपींचा माग काढला.
या तपासात मिळालेल्या धागेदोऱ्यांच्या आधारे गुन्हे शाखेचे पथक थेट राजस्थानमध्ये पोहोचले आणि एका संशयिताला ताब्यात घेण्यात यश मिळवले. दरम्यान, या प्रकरणातील दुसऱ्या आरोपीचा शोध सुरू असून तपास अधिक वेगाने सुरू असल्याची माहिती पोलिसांनी दिली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.