Pune Crime News : शिंदेसेनेतील माजी उपसरपंचांचा प्राणघातक हल्ल्यात मृत्यू....

Pune, 01 December : शिरूर तालुक्यातील शिक्रापूरच्या माजी उपसरपंचांवर धारदार शस्त्रांनी प्राणघातक हल्ला करण्यात आला असून उपचारासाठी रुग्णालयात नेत असताना वाटेतच त्यांचा मृत्यू झाला. हल्ल्याचे कारण अद्याप अस्पष्ट आहे. ही घटना रविवारी (ता. ०१ डिसेंबर) दुपारी सव्वा बाराच्या सुमारास शिक्रापूर येथे घडली आहे. या घटनेमुळे शिक्रापुरात खळबळ उडाली आहे.

दत्तात्रय गिलबिले असे प्राणघातक हल्ल्यात मृत्यू झालेल्या उपसरपंचांचे (Deputy Sarpanch) नाव आहे. या प्रकरणी त्यांची पत्नी रोहिणी दत्तात्रेय गिलबिले यांनी फिर्याद दिली आहे. त्यानुसार एकावर गुन्हा दाखल करण्यात आला असून आरोपी निष्पन्न झाला आहे. पोलिस त्याच्या मागावर असल्याचे शिक्रापूर पोलिसांनी सांगितले.

दत्तात्रेय गिलबिले हे आज दुपारी सव्वा बाराच्या सुमारास त्यांच्या घरी होते. त्या वेळी अज्ञात आरोपीने त्यांच्यावर धारदार शस्त्रांनी प्राणघातक हल्ला केला. गिलबिले यांच्या मानेवर आणि पाठीवर गंभीर स्वरुपाचे वार करण्यात आले आहेत. या हल्ल्यात (Attack) गिलबिले हे गंभीर जखमी झाले होते. हल्ल्यानंतर हल्लेखोर पळून जाण्यात यशस्वी ठरला आहे.

जखमी अवस्थेतील गिलबिले यांना तातडीने गावातील रुग्णालयात दाखल करण्यात आले. मात्र, डॉक्टरांनी त्यांना पुण्याला हलविण्यास सांगितले. त्यांना पुण्याला नेत असताना वाटेतच त्यांची प्राणज्योत मालवली. उपचारासाठी नेत असतानाच त्यांचा मृत्यू झाला आहे.

या प्रकरणी दत्तात्रेय गिलबिले यांची पत्नी रोहिणी यांनी शिक्रापूर पोलिस ठाण्यात फिर्याद दिली आहे. त्यानुसार एकावर गुन्हा दाखल करण्यात आला आहे. आरोपी निष्पन्न झाला असून पोलिस त्याच्या मागावर आहेत. हल्ल्याचे कारण मात्र अद्याप अस्पष्ट आहे. या घटनेमुळे शिरूर तालुक्यात खळबळ उडाली आहे.

दरम्यान, दत्तात्रेय गिलबिले हे २०१५ ते १६ या वर्षात शिक्रापूरचे उपसरपंच होते. शिवसेनेत फूट पडल्यानंतर त्यांनी मुख्यमंत्री एकनाथ शिंदे यांच्या शिवसेनेसोबत जाणे पसंत केले होते. तेव्हापासून ते एकनाथ शिंदे यांच्यासोबत होते. विधानसभा निवडणुकीत त्यांनी महायुतीचे काम केले होते.