Manikrao Kokate News : राजीनामा लिहिलेल्या कोकाटेंच्या आशा पुन्हा पल्लवित; अजितदादांच्या एका अटीने गेम फिरला

Manikrao Kokate : वादग्रस्त कृषीमंत्री माणिकराव कोकाटे यांचा राजीनामा होणार नसल्याचे जवळपास निश्चित झाले आहे. केवळ त्यांचे खाते बदलले जाण्याची शक्यता आहे. उपमुख्यमंत्री अजित पवार आणि कोकाटे यांची बैठक झाली. यात कोकाटे यांना अत्यंत कडक शब्दात समज दिली. त्यामुळे त्यांचा राजीनामा घेणार असल्याच्या बोलले जात होते. पण यानंतर झालेल्या मंत्रिमंडळ बैठकीमध्ये अजित पवार यांनी मुख्यमंत्री देवेंद्र फडणवीस यांच्यासमोर एक अट ठेवली. त्यानंतरच कोकाटे यांच्या राजीनाम्याचा गेम फिरला असल्याचे बोलले जाते.

नेमकं काय घडलं?

माणिकराव कोकाटे आणि अजित पवार यांची आज (मंगळवार) भेट झाली. मंत्रिमंडळ बैठकीला जाण्यापूर्वी अजितदादांच्या अँटीचेंबरमध्ये दोघांमध्येही 1 तासापेक्षा जास्त वेळ चर्चा झाली. साम वृत्तवाहिनीने दिलेल्या बातमीनुसार, "कितीवेळा चुकणार? कितीवेळा माफ करायचं?" असा सवाल कोकाटे यांना केला. "आम्ही तुम्हाला खूप सांभाळून घेतलं. पण आता विषय पुढे गेला आहे. तुमच्यामुळे सरकारची बदनामी होत आहे", अशा शब्दात अजितदादांनी नाराजी व्यक्त केली.

आजच नाशिकमधील कोकाटे समर्थकांचे शिष्टमंडळ अजित पवार यांच्या भेटीसाठी आले होते. या भेटीत कोकटे यांचा राजीनामा घेऊ नये, अशी विनंती करण्यात आली. यावर राजीनामा घेऊ नये म्हणून भेटीसाठी आला आहात, मंत्रिपद दिले तेव्हा आला होता का? असा सवाल विचारला. तसेच हा विषय आता माझ्या हातात नाही, असेही सांगितले. त्यामुळे कोकाटे यांचा राजीनामा घेतला जाणार यावर शिक्कामोर्तब झाले होते.

अजित पवार यांनी या बैठकीदरम्यान, प्रदेशाध्यक्ष सुनील तटकरे, खासदार प्रफुल्ल पटेल आणि प्री कॅबिनेट बैठकीसाठी आलेल्या काही वरिष्ठ मंत्र्यांसोबत चर्चा केल्याचे सांगितले जाते. यावेळी कोकाटे हे ज्येष्ठ आमदार आहेत. त्यांना समज द्या, कारवाई नको. फार तर खाते बदला असा सल्ला देण्यात आला. त्यानंतर अजित पवार यांच्यासह सर्व मंत्री मंत्रिमंडळ बैठकीसाठी रवाना झाले. इथेच मुख्यमंत्री देवेंद्र फडणवीस यांनीही अत्यंत कडक शब्दात वादग्रस्त मंत्री आणि आमदारांच्या वागण्यावर नाराजी व्यक्त केली.

यावेळी राजीनाम्याचा विषय निघताच अजित पवार यांनी मुख्यमंत्री देवेंद्र फडणवीस यांच्यासमोर अट ठेवली असल्याची माहिती आहे. शिवसेनेचे मंत्री संजय शिरसाट आणि मंत्री योगेश कदम हे देखील वेगवेगळ्या कारणांनी गोत्यात आले आहेत. त्यामुळे त्यांच्याही राजीनाम्याची मागणी केली जात आहे. हाच धागा पकडून शिवसेना मंत्र्यांवर कारवाई झाली तरच राष्ट्रवादी काँग्रेस कोकाटे यांच्यावर कारवाई करेल, असे अजितदादांनी स्पष्ट केल्याची माहिती सूत्रांनी दिली आहे.