Bjp News : आशिष शेलारांनंतर भाजपने दिली मुख्य प्रतोदपदाची जबाबदारी 'या' नेत्यावर

Nagpur news : नागपूरमध्ये विधिमंडळाचे हिवाळी अधिवेशन सुरु आहे. राज्यात सध्या राजकीय घडामोडी मोठ्या वेगाने घडत आहेत. महायुती सरकारच्या मंत्रिमंडळ विस्तारानंतर खातेवाटप कधी होणार, याकडे सर्वांचेच लक्ष लागले आहे. मंत्रीमंडळाच्या खाते वाटपावरून भाजप, शिवसेना शिंदे गट, राष्ट्रवादी काँग्रेस अजित पवार गट या तीन पक्षात चुरस असल्याने गेल्या तीन दिवसापासून चर्चा सुरूच असल्याचे समजते. त्यातच आता भाजपने भाजपच्या मुख्य प्रतोदपदी रणधीर सावरकर यांची निवड केली आहे.

भाजपचे मुख्य प्रतोद असलेल्या आशिष शेलार यांनी मंत्रिमंडळात वर्णी लागली आहे. त्यामुळे त्यांच्या जागी भाजपच्या (Bjp) मुख्य प्रतोदपदी रणधीर सावरकर यांची निवड करण्यात आली आहे. रणधीर सावरकर हे अकोला पूर्वचे आमदार आहेत. या मतदार संघातून रणधीर सावरकर यांनी हॅट्ट्रिक केली आहे. अकोला पूर्व या मतदारसंघातून माजी केंद्रीय राज्यमंत्री संजय धोत्रेंचे भाचे रणधीर सावरकर हे गेल्या तीन टर्मपासून आमदार आहेत. या मतदारसंघातून सलग तीनवेळा त्यांनी विजय मिळवला आहे.

2014 मध्ये भाजप-शिवसेनेच्या युतीमध्ये हा मतदारसंघ शिवसेनेच्या ताब्यात होता. या ठिकाणी 2014 मध्ये रणधीर सावरकर (Randhir Sawarkar) यांनी या मतदारसंघात पहिल्यांदाच भाजपचं कमळ फुलवले. गेल्या दहा वर्षांत आमदार रणधीर सावरकर यांनी मतदारसंघावर चांगलीच पकड बसवली आहे. अकोला जिल्ह्याच्या राजकारणात धोत्रे गटाचे 'चाणक्य' म्हणून जिल्ह्यात रणधीर सावरकर यांची ओळख आहे.

सहा महिन्यापूर्वी झालेल्या लोकसभा निवडणुकीत अकोला पूर्व विधानसभा मतदारसंघातुन त्यांनी भाजपला 27 हजार मतांची आघाडी मिळवून दिली होती. त्यामुळेच भाजपच्या हायकमांडने रणधीर रणधीर सावरकर यांच्यवर मोठी जबादारी देत त्यांची भाजपच्या मुख्य प्रतोदपदी नियुक्ती केली आहे.