CM Fadnavis on reservation issue : आरक्षणावरून सीएम फडणवीसांचा विरोधकांवर हल्लाबोल; म्हणाले, 'एकही नकली व्यक्ती...'

Pune News : सध्या राज्यभरात मराठा व ओबीसी आरक्षणाचा मुद्दा तापला आहे. त्यामुळे सत्ताधारी व विरोधक एकमेकांवर आरोप-प्रत्यारोप करीत आहेत. त्यातच आता आरक्षणाच्या मुद्दयावरून सीएम देवेंद्र फडणवीसांनी विरोधकांवर हल्लाबोल केला आहे. एकही नकली व्यक्तीला ओबीसींचे आरक्षण दिले जाणार नाही, असे पुण्यात प्रसार माध्यमांशी बोलताना फडणवीस यांनी स्पष्ट केले.

माजी मुख्यमंत्री उद्धव ठाकरे (Uddhav Thackeray ) यांनी घालवलेले ओबीसी समाजाचे आरक्षण आता आमच्या सरकारने आणले आहे . एकही नकली व्यक्ती हा ओबीसीमध्ये समाविष्ट होणार नाही. नकलीचा अर्थ जो ओबीसीत नाही असा, अशी व्यक्ती ओबीसीत सहभागी होणार नाही, अशा प्रकारची काळजी जीआरमध्ये घेतलेली आहे. काँग्रेस नेते विजय वडेट्टीवार यांना तर बोलण्याचा अधिकारच नाही. कारण ओबीसींसाठी जे काही केले आहे ते आमच्याच सरकारने केले आहे. त्यामुळे ओबीसी समाजाने चिंता करू नये, असेही त्यांनी स्पष्ट केले.

2014 ते 2025 मध्ये जेवढे निर्णय ओबीसी समाजासाठी झाले ते आमच्या सरकारने घेतले. ओबीसींचं वेगळं मंत्रालय करणारे आम्ही आहोत, ओबीसींसाठी आम्ही योजना आणल्या, आम्ही महाज्योती तयार केली, तसेच ओबीसी विद्यार्थ्यांसाठी वसतीगृह सुरु केले, तसेच ओबीसींचं राजकीय आरक्षण आम्ही आणले. त्यामुळे ओबीसींचं हित पाहणारं कोण आहे ते ओबीसींना चांगलं समजते, असेही फडणवीस (Devendra fadnavis) म्हणाले.

येत्या काळात ज्यांच्याकडे कुणबी नोंदीचे प्रमाणपत्र आहे, त्यांनाच ओबीसींचे आरक्षण मिळणार आहे. त्यामुळे दोन्ही समाजातील नेत्यांनाही खरी वास्तविकता प्रत्येकापर्यंत पोहचवावे, विरोधकांना केवळ राजकारण करता येते, अशी टीका मुख्यमंत्री देवेंद्र फडणवीस यांनी केली.

पुण्यात टोळीयुद्ध नाही आपआपली शत्रुता असल्याचे फडणवीस यांनी स्पष्ट केले. आरक्षणाच्या प्रशानावरून विरोधी पक्षाने राजकारण करू नये, असा मोलचा सल्ला त्यांनी यावेळी दिला. त्यासोबतच ज्येष्ठ नेते शरद पवार कशासाठी प्रसिद्ध आहेत हे सर्वाना माहित असल्याचे सांगत फारसे बोलणे टाळले.