Sanika Awade: भाजप आमदार राहुल आवाडेंची कन्या सानिका आवाडे विजयी! चौथ्या पिढीचं दणक्यात स्वागत, उच्चांकी मतांनी विजय

Sanika Awade: इचलकरंजीचे भाजपचे आमदार राहुल आवाडे यांची कन्या सानिका आवाडे ही जिल्हा परिषद सदस्य म्हणून निवडून आली आहे. कोरोची झेडपी मतदारसंघातून सानिकानं अर्ज दाखल केला होता. सानिकाच्या या विजयानंतर आवाडे कुटुंबाची चौथी पिढी राजकारणात यशस्वीरित्या दाखल झाली असून तिचं जनतेनं दणक्यात स्वागत केलं आहे.

सानिका आवाडेचा १३,९७७ इतक्या उच्चांकी मताधिक्क्यानं विजय झाला आहे. सानिका आवाडे राहुल आवाडेंची कन्या आहे त्याचबरोबर आमदार राजेंद्र पाटील यड्रावकर यांची होणारी सुनबाई आहे. पण सानिकाच्या या विजयामुळं आवाडे कुटुंबातील चौथ्या पिढीचं राजकारणात यशस्वी पदार्पण झालं आहे. जनतेनं ज्येष्ठ नेते माजी खासदार कल्लाप्पा आवाडे, माजी मंत्री प्रकाश आवाडे आणि आमदार राहुल आवाडे यांच्यानंतर आता सानिका आवाडे साथ दिली आहे.

नुकत्याच पार पडलेल्या इचलकरंजी महापालिका निवडणुकीत सानिका आवाडेनं अनेक प्रभागांत प्रचाराची धुरा आपल्या अंगावर घेतली होती. त्यानंतर तिला भाजपनं जिल्हा परिषदेसाठी संधी देण्याचा निर्णय घेतला. कोरोची मतदारसंघातून तिनं विजय मिळवला आहे. विशेष म्हणजे गेल्या जिल्हा परिषदेला सानिकाचे वडील व विद्यमान आमदार राहुल आवाडे यांनी रेंदाळ मतदारसंघाचं प्रतिनिधित्व केलं होतं.

झेडपी अध्यक्षपदाची दावेदार

सानिका आवाडे ही पहिल्यांदाच राजकारणात त्यातही जिल्हा परिषदेच्या निवडणुकीत प्रवेश झाला असला तरी जिल्हा परिषदेच्या अध्यक्षपदाची दावेदारही ती असू शकते अशी माहिती सुत्रांकडून मिळते आहे. यामागे आवाडे कुटुंबाचा वारसा आणि जनतेनं दणदणीत मतांसह दाखवलेला विश्वास या गोष्टी असल्याचं सांगितलं जात आहे.