Satej Patil : एक निवडून आला आणि तिघे पडले, तर विजयी नगरसेवकाचा त्याच दिवशी राजीनामा घेणार, सतेज पाटलांची कार्यकर्त्यांना तंबी

Kolhapur Municipal Election News : कोल्हापूर महानगरपालिकेची निवडणूक यंदा चार सदस्य पद्धतीने होणार असल्याने सर्वच पक्षांना प्रचारासाठी आणि जोडण्यासाठी तंगडतोड करावी लागणार आहे. त्यातच प्रत्येक पक्षाचा उमेदवार तितकाच ताकदवान आणि प्रभावी असणे सर्वच पक्षांसाठी गरजेचा आहे.

चार सदस्य पद्धतीने निवडणूक असल्याने एका उमेदवाराला सोबत असणाऱ्या तीन उमेदवारांचा प्रचार करावा लागणार आहे. हीच खबरदारी घेत काँग्रेस नेते आमदार सतेज पाटील आक्रमक झाले आहेत. त्यांनी स्वतःच्याच पक्षातील कार्यकर्त्यांना थेट तंबी देण्यास सुरुवात केली आहे.

माझी महाविकास आघाडीच्या उमेदवारांना विनंती असणार आहे. प्रभाग चार उमेदवारांचा आहे. सगळेच उमेदवार सर्व ठिकाणी पोहोचणार नाहीत.त्यामुळे प्रत्येकाने मत मागताना चौघांसाठी देखील मागितली पाहिजे. जर एखाद्याने एकच मत मागितलं तर ते लक्षात येतं. प्रभागामध्ये एकच निवडून आला आणि इतर तिघे पराभूत झाले तर निवडून आलेल्या नगरसेवकाचा त्याच दिवशी राजीनामा घेणार. अशा शब्दात काँग्रेसने ते आमदार सतेज पाटील यांनी कसबा बावड्यातील इच्छुक उमेदवारांना तंबी दिली आहे.

त्यामुळे मत मागताना संपूर्ण पॅनल साठी मत मागा अशी माझी विनंती आहे. प्रभागामध्ये एकच निवडून आला आणि इतर तिघे पराभूत झाले तर निवडून आलेल्या नगरसेवकाचा त्याच दिवशी राजीनामा घेणार. असा इशाराही आमदार सतेज पाटील यांनी दिला आहे.

काँग्रेसची दुसरी यादी आज रात्री?

कोल्हापूर महानगरपालिकेसाठी काँग्रेसने (Congress) पहिल्या यादीमध्ये जवळपास 48 उमेदवारांना स्थान दिल्यानंतर दुसरी यादी मध्ये कोणत्या इच्छुकाचे नाव असणार याबाबत उत्सुकता लागून राहिली आहे. शिवाय काँग्रेस आणि शिवसेना ठाकरे यांची आघाडी असल्याने शिवसेना ठाकरे पक्षाला सात जागांवर समाधान मानावे लागणार आहे. उर्वरित 26 उमेदवार यांची यादी आज रात्री काँग्रेसकडून जाहीर होण्याची शक्यता आहे.