Solapur, 14 July : मनोज जरांगे पाटील यांच्या मुंबईतील आंदोलनाला पाठिंबा देणाऱ्या काँग्रेस खासदार प्रणिती शिंदे यांच्यावर ओबीसी नेते प्रा. लक्ष्मण हाके यांनी जोरदार हल्लाबोल केला आहे. तुमच्या बापाने ओबीसी आरक्षणाच्या नरडीचा घोट घेतला, अशी जहाल टीका हाके यांनी प्रणिती यांच्यावर केली आहे. ‘ओबीसी मरो आणि आमचे राजकारण जगो,’ या न्यायाने तुम्ही वागणार असाल तर तुमचा करेक्ट कार्यक्रम सोलापूर लोकसभा मतदारसंघात करण्यात येईल, असा इशाराही हाकेंनी दिला आहे.
मराठा समाजातील 56 लाख बांधवांना कुणबी दाखले देण्याचा निर्णय तत्कालीन मुख्यमंत्री एकनाथ शिंदे यांनी घेतला, त्याची अंमलबजावणी करावी, यासाठी 20 लाख मराठ्यांना घेऊन मनोज जरांगे पाटील (Manoj Jarange Patil) मुंबईत आझाद मैदानावर आंदोलन करणार आहेत. खासदार प्रणिती शिंदे यांनी मनोज जरांगे पाटील यांची भेट घेऊन त्यांच्या आंदोलनाला पठिंबा दिला. त्यावरून प्रा. लक्ष्मण हाके यांनी खासदार शिंदे यांच्यावर जोरदार टीकास्त्र सोडले आहे.
लक्ष्मण हाके म्हणाले, माजी मुख्यमंत्री सुशीलकुमार शिंदे यांची कन्या आणि सोलापूरच्या खासदार प्रणिती शिंदे (Praniti Shinde) ह्या परवा मनोज जरांगे पाटील यांना भेटायला गेल्या हेात्या. सोलापूर जिल्ह्यातील बहुसंख्या ओबीसी, भटक्या जाती जमातींच्या जीवावर त्या राजकारण करत आहेत, सध्या त्या खासदारकी भोगत आहेत. तुम्ही मनोज जरांगेंना पाठिंबा दिला. पण, तो पाठिंबा देत असताना मनोज जरांगे यांची काय मागणी काय आहे, याची विचार प्रणिती शिंदे यांनी केला नाही.
आम्हाला (मराठ्यांना) ओबीसीमधून आरक्षण पाहिजे, असे मनोज जरांगे पाटील म्हणत असतील आणि ते आंदोलन उभे करतील असतील तर तुम्ही त्यांना पाठिंबा द्यायला गेलात. प्रणिती शिंदे, तुमच्या वडिलांनी मुख्यमंत्री असताना मराठा आणि कुणबी एकच समजण्यात यावा, असा एक जीआर काढला होता. कुणब्यांना ओबीसीने आरक्षणात समावून घेतलं होतं. पण मराठा कुणबी एक समजण्यात यावा, या एका निर्णयामुळे मागास जाती, भटक्या जमाती यांचे ओबीसीचे आरक्षण मोडीत निघालं, असा आरोपही लक्ष्मण हाके (Laxman Hake) यांनी दिला.
हाके म्हणाले, ओबीसी आरक्षणाची घटनात्मक चौकट उद्‌ध्वस्त करण्याचे काम २००४-०५ मधील सुशीलकुमार शिंदे यांच्या सरकारच्या अध्यादेशामुळे झाले आहे. प्रणितीताई, तुमच्या बापाने ओबीसी आरक्षणाच्या नरडीचा घोट घेतला आहे. त्यांच्याच पावलावर पाऊल ठेवून तुम्ही मनोज जरांगे यांच्यासारख्या जातीयवादी माणसाला भेटायला गेलात. पण तुम्ही त्यांना त्यांची मागणी काय आहे, हे नाही विचारलं?
मराठ्यांना ओबीसीतून आरक्षण दिलं. मूळ ओबीसीतील जो सामाजिकदृष्ट्या मागास आहे, त्यांच्या प्रतिनिधीत्वाचे काय होणार. मराठा समाजाच्या स्पर्धेत या जाती टिकतील का. या प्रश्नाचा विचार तुम्ही नाही केला. तुमच्या बाबाने केला नाही आणि आता तुम्ही मनोज जरांगे पाटील यांना पाठिंबा द्यायला गेलात. तुमच्या या कृत्याचा निषेध करतो. तुम्ही ज्या सोलापूरमधून निवडून येता, त्या मतदासंघात भटक्या विमुक्त जाती जमाती आणि ओबीसींचे किती मतदान आहे, याचा विचार तु्ही करायला पाहिजे होता. ओबीसी मरो आणि आमचे राजकारण जगो, या न्यायाने तुम्ही वागणार असाल तर तुमचा करेक्ट कार्यक्रम सोलापूर लोकसभा मतदारसंघात करण्यात येईल, असा इशाराही हाके यांनी दिला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.