Shivsena UBT : दोन जिल्हाप्रमुख एकमेकांचे तोंडही बघत नाहीत; एकच जिल्हाप्रमुख नेमा : ठाकरेंच्या शिवसेनेत खदखद

Nagpur, 14 July : एक से भले दो असे म्हटले जाते. मात्र, शिवसेना उद्धव बाळासाहेब ठाकरे पक्षाला दोन जिल्हाप्रमुख अडचणीचे वाटू लागले आहेत. नागपूर शहरात दोन जिल्हाप्रमुख असल्याने आपसांतच स्पर्धा वाढली आहे. दोन गट पडले आहेत. दोन्ही जिल्हाप्रमुख एकमेकांचे तोंडही बघत नाहीत. संवाद सोडाच, एकमेकांच्या कार्यक्रमालासुद्धा जात नाहीत. त्यापेक्षा एक जिल्हा, एक जिल्हाप्रमुख करा, अशी मागणी केली जात आहे. शिवसेना उद्धव बाळासाहेब ठाकरे पक्षाच्या पदाधिकाऱ्यांची बैठक शनिवारी रेशीमबाग येथील सेना भवन येथे झाली. यात सर्वांनी हीच भावना शहराचे संपर्कप्रमुख सतीश हरडे यांना बोलून दाखवली.

सध्या नागपूरमध्ये माजी उपमहापौर किशोर कुमेरिया आणि प्रमोद मानमोडे असे दोन जिल्हा प्रमुख आहेत. विधानसभेच्या निवडणुकीत दोन्ही जिल्हाप्रमुखांनी दक्षिण नागपूर विधानसभा मतदारसंघावर दावा केला होता. विशेष म्हणजे दोन्ही जिल्हा प्रमुख यापूर्वी दक्षिण नागपूर विधानसभा मतदारसंघातून लढले होते. उपमुख्यमंत्री एकनाथ शिंदे बाहेर पडल्यानंतर तशीही शिवसेनेत (Shivsena) उभी फूट पडली आहे. आधीच कार्यकर्ते विखुरल्या गेले आहेत. त्यात दोन जिल्हा प्रमुखांमुळे पडलेल्या दोन गटांमुळे पक्षाची ताकद कमी होत असल्याचा सांगण्यात आले.

नागपूर (Nagpur) महापालिकेच्या निवडणुकीत ही परिस्थिती परवडण्यासारखी नाही, याकडेही बैठकीत अनेकांनी लक्ष वेधले. एकच जिल्हा प्रमुख करा, त्याला अधिकार द्या. त्याच्याच नेतृत्वात महापालिकेची निवडणूक लढावी, अशी मागणी यावेळी करण्यात आल्याचे समजते. दोन्ही जिल्हाप्रमुख एकमेकांच्या कार्यक्रमांना जाणे टाळतात. संवादही साधत नाहीत. रविवारी झालेल्या बैठकीतसुद्धा एकच जिल्हा प्रमुख उपस्थित होते.

माजी उपमहापौर शेखर सावरबांधे हेसुद्धा यापूर्वी शिवसेना उद्धव बाळासाहेब ठाकरे पक्षाचे जिल्हा प्रमुख होते. भाजप-शिवसेना युती असताना सावरबांधे यांना दक्षिण नागपूरमधून तिकीट देण्याचा शब्द उद्धव ठाकरे यांनी दिला होता. त्यांनी निवडणुकीची पूर्ण तयारी केली होती. भगवे दुपट्ट्यांपासून जाहीरनाम्याची छपाईसुद्धा केली होती. त्यावेळी किशोर कुमेरिया हेसुद्धा येथून लढण्यास उत्सुक होते.

शेवटच्या क्षणी मुंबईत बैठका झाल्या आणि सावरबांधे यांचे तिकीट कापले गेले. त्यांच्याऐवजी कुमेरिया यांना उमेदवारी देण्यात आली होती. त्यावेळी स्वतः उद्धव ठाकरे नागपूरला आले. त्यांनी सावरबांधे यांची समजूत काढली. त्यांना पुन्हा सक्रिय करून घेतले. सोबतच पुढल्यावेळी तुम्हालाच तिकीट दिली जाईल असेही आश्वासन दिले होते.

उद्धव ठाकरे यांच्या शब्दामुळे शेखर सावरबांधे हे पुन्हा सक्रिय झाले. पाच वर्षे प्रतीक्षा केली. पुन्हा निवडणुका जाहीर झाली आणि सावरबांधे यांचे नाव पुन्हा संभाव्य उमेदवार म्हणून पुन्हा झळकायला लागले.

या दरम्यान, भाजप आणि शिवसेनेचे युती तुटली. असे असतानाही सावरबांधे यांनी लढायची तयारी दर्शवली. मात्र तिकीट किरण पांडव घेऊन आले. त्यामुळे सावरबांधे यांचा संयम सुटला. त्यांनी बंडखोरी करीत उद्धव ठाकरे यांना जय महाराष्ट्र केला. सध्या ते राष्ट्रवादी काँग्रेस शरदचंद्र पवार पक्षात कार्यरत आहेत.