Sameer Bhujbal : लक्ष्मण हाकेंबाबत प्रश्न विचारताच समीर भुजबळ चिडले, म्हणाले, हाकेंबद्दल तुम्हाला फार प्रेम आहे का?...त्यांनाच जाऊन विचारा’

Solapur, 13 July : उपमुख्यमंत्री अजित पवार यांच्यावर पातळी सोडून टीका करणारे लक्ष्मण हाके यांच्याबाबत लागोपाठ प्रश्न विचारताच समता परिषदेचे नेते तथा माजी खासदार समीर भुजबळ हे पत्रकारांवरच चिडले. तुम्हाला हाकेंबद्दल फार प्रेम आहे का? मी कोणाचे तोंड बंद करू शकत नाही, त्यांना जाऊन विचारा, असा संताप समीर भुजबळ यांनी व्यक्त केला.

राष्ट्रवादी काँग्रेसचे माजी खासदार समीर भुजबळ (Sameer Bhujbal) हे आज (ता. १३ जुलै) सोलापूरच्या दौऱ्यावर आले होते. माध्यमांशी संवाद साधताना त्यांना प्रा. लक्ष्मण हाके यांच्याबाबत विचारण्यात आले, त्या वेळी त्यांनी माध्यमांवरच राग काढला. लक्ष्मण हाके यांच्याकडून वारंवार अजित पवारांना टार्गेट करण्याचा प्रयत्न केला जात आहे. या प्रश्नावर भुजबळ यांनी उत्तर दिले.

ते म्हणाले, छगन भुजबळ हे आता मंत्रिमंडळात आहेत. लक्ष्मण हाके यांनी जे मुद्दे मांडले आहेत, त्यासंदर्भात भुजबळांनी अगोदरच आपली भूमिका मंत्रिमंडळासमोर मांडलेली आहे. निधीच्या संदर्भात हाकेंनी जो मुद्दा मांडला आहे. त्याबाबत भुजबळांनी महाज्योतीला निधी देण्याचा मुद्दा अजितदादांच्या (Ajit Pawar) पुढे मांडला आणि त्यांनी तो मंजूरदेखील केला आहे.

कधी कधी काय होतं की, एवढ्या गोष्टी असतात, त्यामुळे त्रुटी राहताच असतात. पण, वेगवेगळ्या माध्यमातून त्याची पूतर्ता करण्याचे काम सुरू असतं. फक्त एकच गोष्ट पकडायची आणि त्यावर आंदोलन छेडायचं, हे काही बरोबर नाही, असेही समीर भुजबळ यांनी लक्ष्मण हाकेंच्या (Laxman Hake) प्रश्नावर स्पष्ट केले.

लक्ष्मण हाकेंच्या भूमिकेमुळे मराठा विरुद्ध ओबीसी असा वाद निर्माण होणं कितपत योग्य आहे. त्यावर समीर भुजबळ म्हणाले, आता आपण कोणा कोणाला थांबवू शकतो. सर्वांनी संयमाची भूमिका घ्यायला पाहिजे. जे चुकीचे आहे, त्याला विरोध केला पाहिजे. पण, कुठचंही कारण काढायचं आणि आंदोलन करायचं, त्यातून दिशाभूल होईल, असं कोणी करु नये, अशी आमची भूमिका आहे.

लक्ष्मण हाकेंच्या भूमिकेचा फायदा घेण्याचा प्रयत्न होत आहे का? त्यावर समीर म्हणाले, लोकशाही आहे, कोण काय करेल, आम्ही काय प्रत्येकाचे तोंड तर बंद करू शकत नाही. त्यांनी समजून घेतलं पाहिजे की कुठं करायचं आणि कुठं नाही ते. त्या पद्धतीने वागलं पाहिजे. आपला मूळ प्रश्न भरकटू नये, याकडे त्यांनी लक्ष देण्याची आवश्यकता आहे.

हाकेंच्या संदर्भात प्रश्नावर मात्र समीर भुजबळ चिडलेच. तुम्हाला हाकेंबद्दल फार प्रेम आहे का? असा उलटा सवाल भुजबळ यांनी पत्रकारांना केला. पुढे ते म्हणाले, ओबीसींचे नेतृत्व करणारे अनेक लोक आहेत. अजित पवारांवर ते फारच खालच्या पातळीवर टीका करत आहेत, असे सांगताच भुजबळांनी ‘तुम्हाला हाकेंबद्दल फार प्रेम आहे का,’ असा प्रश्न विचारत ‘लोकशाही आहे, ते त्यांच्या पद्धतीने करू शकतात, मी तोंड बंद करू शकत नाही.’ ते ज्या पद्धतीने अजेंडा राबतात, असा प्रश्न विचारण्याआधीच भुजबळांनी, ‘ते त्यांना जाऊन विचारा...’ अशा शब्दांत संताप व्यक्त केला.