Arjun Khotkar PA Cash : ‘बक्षिस’ मिळणाऱ्या रकमेवरही पाणी फेरलं! 'धुळे कॅश' प्रकरणावर शरद पवारांच्या शिलेदाराने घेतली फिरकी

Rohit Pawar News : धुळे जिल्ह्याच्या दौऱ्यावर असलेल्या विधीमंडळ अंदाज समितीमधील आमदारांना कोट्यवधी रुपये देण्यात येत असल्याचा आरोप माजी आमदार अनिल गोटे यांनी केला. गोटे यांनी धुळे शासकीय विश्रामगृहात आमदार अर्जून खोतकर यांचे पीएच्या खोलीवर धाड मारत खोलीला कुलूप लावले. या खोलीत कोट्यावधी रुपये सापडले आहेत. त्यामुळे आता यावरून राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी सरकारला टोला लगावला आहे.

'एखाद्या चांगल्या कामगिरीसाठी रोख रकमेचं बक्षीस दिलं जातं... धुळ्यात गेलेल्या अंदाज समितीनेही अशी काही दैदिप्यमान कामगिरी केली असेल का? आणि म्हणून त्यांना ‘बक्षिस’ देण्यासाठी कोट्यवधी रुपये रक्कम जमा केले असतील का? हा संशोधनाचा विषय आहे.', असे रोहित पवार यांनी ट्विट करत म्हटले आहे.

'अवकाळी पावसाप्रमाणे अनिल गोटे साहेब त्या 102 क्रमांकाच्या खोलीत अचानक हजर झाले आणि त्यांच्यामुळं अंदाज समितीच्या ‘दैदिप्यमान कामगिरी’वर आणि ‘बक्षिस’ म्हणून मिळणाऱ्या रकमेवरही पाणी फेरलं गेलं!', असे देखील रोहित पवारांनी म्हटले आहे.

संजय राऊत काय म्हणाले?

संजय राऊत यांनी बुधवारी रात्री ट्विट करत म्हटले की,विधिमंडळ आमदारांची अंदाज समिती आज धुळे जिल्हा दौऱ्यावर आली असता , या समितीला मलिदा देण्याकरता जवळपास साडेपाच कोटी रुपये धुळे शासकीय विश्रामगृह गुलमोहर येथे रूम नंबर 102 मध्ये जमा करण्यात आले होते त्या ठिकाणी शिवसेनेचे माजी आमदार अनिल अण्णा गोटे, शिवसेना जिल्हाप्रमुख अतुल सोनवणे, उपजिल्हाप्रमुख नरेंद्र परदेशी, महानगर प्रमुख धीरज पाटील यांच्यासह सर्व शिवसेना पदाधिकाऱ्यांनी सदरच्या रूमला कुलूप लावून पहारा ठेवला आहे.

आमचा संबंध नाही - अर्जून खोतकर

धुळे जिल्ह्याच्या दौऱ्यावर असलेले विधीमंडळ अंदाज समितीचे अध्यक्ष आमदार अर्जून खोतकर आहेत. खोतकर यांच्या पीएच्या खोलीत पैसे भेडल्याने त्यांना टार्गेट करण्यात येत आहे. मात्र, याविषयी स्पष्टीकरण देताना खोतकर म्हणाले, आम्ही जिल्हाच्या दौऱ्यावर आहोत. आम्ही विश्रामगृहाकडे गेलेलो नाही. त्यामुळे तिथे जे पैसे सापडले आहेत त्याच्याशी आमचा संबंध नाही.