Mumbai News : हिंदी सक्तीच्या विरोधात एकत्र आलेल्या राज व उद्धव ठाकरे यांनी सुमारे 20 वर्षानंतर एकत्र येत विजयी मेळावा साजरा केला. त्यानंतर 22 दिवसातच राज ठाकरे यांनी उद्धव ठाकरेंच्या वाढदिवसानिमित्त प्रथमच मातोश्रीवर जाऊन शुभेच्छा दिल्या आहेत. या निमित्ताने राज ठाकरे 20 वर्षानंतर प्रथमच शुभेच्छा देण्यासाठी मातोश्रीवर दाखल झाले. यावेळी राज ठाकरे यांनी वाढदिवसाच्या निमित्ताने भरभरून शुभेच्छा दिल्या. या दोन बंधूंच्या भेटीनंतर यावेळी उद्धव ठाकरे यांनी मोठे विधान केले.
प्रसार माध्यमाशी बोलताना उद्धव ठाकरे (Uddhav Thackeray) यांनी राज ठाकरे यांच्या भेटीनंतर मला खूप आनंद झाला आहे, अशी प्रतिक्रिया व्यक्त केली. राज ठाकरे यांचे स्वागत करण्यासाठी उद्धव ठाकरे स्वत: मातोश्रीच्या गेटवर उभे होते. राज ठाकरे येताच उद्धव ठाकरे यांनी त्यांना मिठी मारली. त्यावेळी राज ठाकरे यांनी त्यांच्या हातात लालभडक गुलाबांचा मनमोहक पुष्पगुच्छ देत त्यांना वाढदिवसाच्या शुभेच्छा दिल्या. यावेळी राज व उद्धव ठाकरे यांच्यात मातोश्रीवर जवळपास 20 मिनिटे चर्चा झाली. या चर्चेचे तपशील मिळू शकले नाही.
दरम्यान, ठाकरे बंधू गेल्या 22 दिवसांनंतर दुसऱ्यांदा एकत्र भेटत आहेत. यावेळी मातोश्रीमधील बाळासाहेब ठाकरे यांच्या फोटोसमोरच दोघांनी भेट घेतली. त्यासोबतच जुन्या आठवणींना उजाळा देत व्यंगचित्रावर देखील यावेळी दोघांमध्ये चर्चा झाली. राज ठाकरे यांची मातोश्रीवर जाण्याची कृती अनेक अर्थांनी महत्त्वाची मानली जात आहे. त्यामुळे मुंबई महानगरपालिका निवडणुकीत शिवसेना आणि मनसे एकत्र येण्याची शक्यता वाढली आहे.
रविवारी सकाळपासूनच मातोश्रीवर उद्धव ठाकरे यांच्या वाढदिवसानिमित्त शुभेच्छा देण्यासाठी शिवसैनिकानी मोठी गर्दी केली होती. त्यातच रविवारी दुपारी 12 च्या सुमारास मनसेचे प्रमुख राज ठाकरे (Raj Thackeray) अचानक शुभेच्छा देण्यासाठी मातोश्रीवर आले. त्यामुळे या ठिकाणचे वातावरण पूर्ण बदलून गेले होते. यावेळी उद्धव ठाकरे यांच्या शिवसेनेचे खासदार संजय राऊत, अरविंद सावंत यांच्यासह मनसेचे नेते बाळा नांदगावकर, नितीन सरदेसाई यांच्यासहा मोठया संख्येने नेतेमंडळी व शिवसैनिक उपस्थित होते.
ठाकरे बंधू वाढदिवसाच्या निमित्ताने एकत्र आल्याने शिवसैनिकात आनंदाचे वातावरण आहे. तर दुसरीकडे आता राजकीय दृष्टया उद्धव ठाकरे यांची शिवसेना व मनसे एकत्र कधी येणार याची उत्सुकता लागली आहे. गेल्या काही दिवसापासून या विषयावर बोलण्यास राज ठाकरे यांनी त्यांच्या नेत्यांना बंदी घातली होती. त्यामुळे दोघे एकत्र येणार की नाही याची उत्सुकता शिगेला पोहचली होती.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.