Eknath Shinde : 'कॉमन मॅन' असताना दोन, चार जागांसाठी महायुती कशासाठी करायची; शिंदेंच्या शिवसेनेचा सवाल

Nagpur News : महापालिकेची निवडणूक होणार असल्याने सर्वत्र युती आणि आघाडीच्या चर्चा सुरू झाल्या आहेत. मोठ्या पक्षांचा कल स्वबळावर लढण्याचा आहे. त्यामुळे छोट्या पक्षांच्या कार्यकर्त्यांमध्ये अस्वस्थता आहे. आपण स्वबळावर लढण्यास टिकाव लागेल का असा ही प्रश्न त्यांना पडत आहे, असे असले तरी शिंदे सेनेच्या नागपूरमधील पदाधिकाऱ्यांनी भाजपसोबत युती करून चारदोन जागेवर लढण्यास विरोध केला आहे.

दुसरीकडे शिवसेना (Shivsena) कशाच्या बळावर मते मागणार? असा सवालही केला जात आहे. यावर आमचे नेते एकनाथ शिंदे, मुख्यमंत्री असताना त्यांनी केलेली विकास कामे तसेच त्यांचा ‘कॉमन मॅन' चेहरा हीच शिवसैनिकांची शिदोरी असल्याचा दावा शहर प्रमुख सुरज गोजे यांचा आहे.

सध्या नागपूरमध्ये उद्धव ठाकरे आणि एकनाथ शिंदे अशा दोन सेना कार्यरत आहेत. कार्यकर्ते विखुरले गेले आहेत. यापूर्वी शिवसेनेचे दोनच नगरसेवक निवडून आले होते. ते उद्धव यांच्याकडे आहेत. शिंदे सेनेकडे एकही माजी नगरसेवक नाही. ही आकडेवारी बघता भाजप शिंदे सेनेसाठी जागा सोडण्यास राजी नाही. अनेकांचा यास विरोध आहे.

यापूर्वी भाजपच्या (BJP) एका नेत्याने जागा मागताना आपताना अंथरून पाहून पाय पसरण्याचा सल्ला दिला आहे. यावर शिंदे सेनेचे शहर प्रमुख सूरज गोजे म्हणाले, स्वतःच्या ताकदीवर नागपूरमध्ये लढणे पक्षासाठी योग्य राहील. विधानसभेच्या निवडणुकीत शिवसेनेला एकही मतदारसंघ सोडला नव्हता. आमचे कार्यकत्यांनी भाजपचाच प्रचार केला. त्यांचे कमळ घरोघरी पोहचले. आता महापालिकेच्या निवडणुकीमुळे शिवसैनिकांना संपर्क साधता येणार आहे, धनुष्यबाण घेऊन मतदारांकडे जाता येणार आहे. युतीमध्ये राहिलो तर फार काही जागा भाजप सोडणार नाही. हे दिसतच आहे. त्यापेक्षा आम्ही सर्व जागांवर लढलो तर जास्त फायद्याचे ठरेल. कार्यकर्तेसुद्धा समाधानी राहतील.

प्रत्येकाला आपली ताकद कळेल. महापालिकेच्या निवडणुकीत पराभूत झालो तरी पक्षाचा टक्का समोर येईल. भविष्यातील निवडणुकीचे नियोजन यातून करता येईल. शिवसैनिकांचा स्वबळाचा आग्रह यासाठीच आहे. आम्ही नागपूरमधील शंभर बुथवर निवडणुकीचे नियोजन केले आहे. काही चांगले आणि निवडून येण्याची क्षमता असणारे उमेदवार आमच्याकडे आहेत. चार सदस्यांच्या प्रभाग ही आमची अडचण आहे. मात्र एक सदस्यीय प्रभाग पद्धती असती तर आमच्या 30 ते 40 नगरसेवकांचा आकडा महापालिकेत दिसला असता.

आता चार सदस्यांचा प्रभाग जाहीर झाला आहे. त्यादृष्टीने नियोजन करण्याची गरज आहे. आम्ही उमेदवार निवडताना अ. ब. क. अशी कॅटेगिरी तयार केली आहे. गरजेनुसार सर्वांचा वापर केला जाईल. नागपूरमधील शिवसैनिकांची स्वतःच्या ताकदीवर महापालिकेची निवडणूक लढण्याची भावना आमचे नेते उपमुख्यमंत्री एकनाथ शिंदे यांना कळवली आहे. महायुतीचा अद्याप निर्णय व्हायचा आहे. मात्र, आम्ही आमची तयारी करतो आहे.

आमच्याकडे एकनाथ शिंदे यांचा चेहरा आहे. मुख्यमंत्री असताना त्यांनी केलेल्या कामांची शिदोरी आहे. त्यांच्यात दिसणारा ‘कॉमन मॅन' मतदाराना भावतो आहे. हीच शिंदे सेनेची जमेची बाजू आहे. महापालिकेच्या निवडणुकीचा निकाल काय लागेल याने काही फरक पडत नाही, मात्र आमची ताकद सर्वांना दिसेल, असा दावाही सूरज गोजे यांचा आहे.