Nagpur Municipal Corporation: मुस्लिम लीग, बसपला झाली घाई; बळकावले परस्पर महापालिकेतील कक्ष

Nagpur News : नागपूर महापालिकेत अद्याप सत्ता स्थापन व्हायची आहे. महापौर आणि उपमहापौरांची निवड व्हायची आहे. असे असताना काही पक्षांच्या नेत्यांनी महापालिकेच्या मुख्यालयातील कक्ष बळकावणे सुरू केले आहे. त्यावर आपल्या पक्षाच्या नावाच्या पाट्याही लावल्या आहेत. यात बसपा आणि मुस्लिम लीग या पक्षांच्या समावेश आहे. महापालिका प्रशासनाने अद्याप कोणालाही कक्ष वितरित केला नसल्याचे स्पष्ट केले आहे.

महापालिकेच्या निवडणुकीत भाजपचे 102 तर काँग्रेसचे 34 नगरसेवक निवडून आले आहेत. सहा जानेवारीला भाजप सत्ता स्थापन करण्याचा दावा करणार आहे. याचवेळी महापौर, उपमहापौर यांच्यासही स्थायी समितीच्या 17 सदस्यांची निवड केली जाणार आहे. महापौरपदाच्या निवडणुकीत काँग्रेसने (Congress) उमेदवार उभा करण्याचा निर्णय घेतला आहे. त्यामुळे निवडणूक होणार असल्याचे निश्चित झाले आहे.

यावेळेसच्या सार्वत्रिक निवडणुकीत बसपाचा (BSP) फक्त एकच नगरसेवक निवडून आला आहे. मागच्या दोन निवडणुकीत त्यांचे 10 नगरसेवक होते. बसपाच्या नगरसेवकांना बसण्यासाठी महापालिकेच्या मुख्यालयात स्वतंत्र कक्ष उपलब्ध करून देण्यात आला होता. यावेळी फक्त एकच नगरसेवक असतानाही बसपाने आपल्या जुन्या कक्षावर दावा केला आहे.

महापालिका निवडणुकीचा निकाल जाहीर होताच कक्षाच्या समोर बसपा आपला फलक लावून त्यावर दावा केला आहे. 2012 च्या निवडणुकीत मुस्लिम लीगचे दोन नगरसेवक निवडून आले होते. त्यांनाही महापालिकेच्यावतीने कक्ष देण्यात आला होता. 2017 च्या निवडणुकीत मुस्लिम लीगचे सर्वच उमेदवार पराभूत झाले होते.

यावेळी लीगचे चार नगरसेवक निवडून आले आहे. त्यांनी आपल्या गटाची नोंदणीसुद्धा केली आहे. त्यांनी आपल्या जुन्याच कक्षावर दावा केला आहे. मुस्लिम लगीच पक्षाचा फलकही लावला आहे. आम्ही दावा केलेले कक्ष आम्हाला यापूर्वी देण्यात आले होते. तेच पुन्हा यावेळी मिळावे यासाठी आम्ही महापालिका प्रशासनाला पत्र दिले असल्याचे दोन्ही पक्षाच्या नेत्यांचे म्हणणे आहे. मात्र प्रशासनाने अद्याप सत्तास्थापन व्हायची असल्याने कुठल्याच पक्षाला कक्ष वितरित केले नसल्याचे स्पष्ट केले आहे.