Kunal Kamra Song : तोडफोडीनंतर शिवसेनेच्या ‘या’ मंत्र्याने कुणाल कामराचं शिंदेंवरील ‘ते गाणं’ पाहण्याची व्यक्त केली इच्छा!

Mumbai, 24 March : स्टॅडअप कॉमेडियन कुणाल कामरा याच्या गाण्यातील नेमकं काय बोचलं, या प्रश्नावर रोजगार हमी योजना मंत्री भरत गोगावले यांनी हसत हसत ‘आम्हीपण अजून तसं ते गाणं पाहिलेलं नाही. पण आता ते पाहणे गरजेचे आहे,’ असे सांगून ते पाहण्याची इच्छा बोलून दाखवली.

कुणाल कामरा (Kunal Kamra) याने ‘थाने की रिक्षा, चेहरे पे दाढी, आंखों पे चश्मा, हाये’ हे व्यंग्यात्मक गाणं सादर केले होते. त्यावर आक्षेप घेत एकनाथ शिंदे यांच्या शिवसैनिकांनी कामरा याचा मुंबईतील स्टुडिओची तोडफोड केली आहे. तसेच हा विषय विधानसभेतही उपस्थित करण्यात आला हेाता, त्यावर मुख्यमंत्र्यांनी उत्तर दिले आहे.

कामरा याच्या त्याच गाण्यातील नेमकी कोणती गोष्ट बोचली, असा जेव्हा भरत गोगावले (Bharat Gogawale ) यांना प्रश्न विचारण्यात आला, तेव्हा त्यांनी आपण ते गाणं पाहिले नसल्याचे स्पष्ट केले. मात्र एवढा मोठा गदरोळ झाल्यानंतर मात्र गोगावले यांनी ते गाणं पाहण्याची इच्छा व्यक्त केली.

विधानसभा अध्यक्ष राहुल नार्वेकर यांच्या उपस्थितीत मुंबई शहरात करण्यात येत असलेल्या सिमेंट काँक्रीटकरण रस्त्याबाबत बैठक घेण्यात आली. या बैठकीला उपमुख्यमंत्री एकनाथ शिंदे, माजी मंत्री आदित्य ठाकरे हेही उपस्थित होते. त्या बैठकीनंतर माध्यमांशी बोलताना आदित्य ठाकरे यांनी शिंदे यांनी थातूर मातूर उत्तरे दिली, असे म्हटले होते. त्याला रोजगार हमी योजना मंत्री भरत गोगावले यांनी उत्तर दिलं.

गोगावले म्हणाले, आदित्य ठाकरे यांचे समाधान आता कधीच होऊ शकत नाही. ते ज्यावेळी सत्तेवर हेाते, त्या वेळी त्यांनी किती लोकांचं समाधान केलं? त्या ठिकाणी बाकीचेही आमदार होते, एकटे आदित्य ठाकरे होते, अशातला भाग नाही. एकनाथ शिंदे यांनी जी बैठक घेतली होती, ती योग्य उत्तर देण्यासाठीच घेतली होती आणि शिंदे यांनी ते दिलेले आहे.

एकनाथ शिंदे यांच्याकडे एमएसआरडीसी हे खातं आहे, त्यामुळे त्यांनी याबाबतच्या प्रश्नाला उत्तरे दिली आहेत, त्यामुळे विरोधक आणि सत्ताधाऱ्यांनी मिळून एकत्र येऊन शिंदे यांच्यावर प्रश्नांचा भडिमार केला, असे नाही. तो मुंबईतील रस्त्याचा प्रश्न होता, असेही गोगावले यांनी स्पष्ट केले.