Sanjay Dina Patil: संजय दिना पाटलांना पत्रकारांचा दणका! शिवसेनेच्या कार्यक्रमांवर बहिष्काराची घोषणा; एकनाथ शिंदेंना लिहिलं पत्र

Sanjay Dina Patil: संजय दिना पाटील यांनी अत्यंत अश्लाघ्य शब्दांत पत्रकारांशी भाषा केली असून त्यांना जीवे मारण्याची धमकी देखील दिली आहे. याचा पत्रकारांनी संताप व्यक्त केला आहे. यासाठी आता राज्यभरातील पत्रकार एकवटे असून त्यांनी संजय दिना पाटलांच्या वैयक्तिक कार्यक्रमांवर तसंच ते आता ज्या पक्षात आहेत त्या शिंदेंच्या शिवसेनेच्या कार्यक्रमांवर बहिष्कार टाकण्याची घोषणा केली आहे. यासंदर्भात पुणे श्रमिक पत्रकार संघानं थेट उपमुख्यमंत्री एकनाथ शिंदे यांना यासंदर्भात पत्र लिहिलं आहे.

पुणे श्रमिक पत्रकार संघाची भूमिका?

ईशान्य मुंबईचे खासदार संजय दिना पाटील यांनी पत्रकारांना शिवीगाळ आणि अरेरावी केल्याचा धक्कादायक प्रकार समोर आला आहे. एका वादग्रस्त राजकीय वक्तव्यावरून खासदार संजय दिना पाटील यांची प्रतिक्रिया घेण्यासाठी इलेक्ट्रॉनिक माध्यमांचे काही पत्रकार हे त्यांच्याकडे गेले होते. त्यावेळी त्यांनी पत्रकारांना धमकावत त्यांच्याशी गलिच्छ भाषेत अरेरावी करत जीवे मारण्याची धमकी दिली आहे. लोकशाहीचा चौथा स्तंभ असलेल्या पत्रकारांना त्यांचे दैनंदिन काम करताना एखाद्या जबाबदार लोकप्रतिनिधीकडून अशाप्रकारे गैरवर्तणूक करणे निंदनीय बाब असून त्याचा पुणे श्रमिक पत्रकार संघातर्फे आम्ही जाहीर निषेध व्यक्त करत आहे.

याबाबत आपण पक्षप्रमुख म्हणून खासदार संजय दिना पाटील यांना योग्य ती समज द्यावी अशी विनंती आहे. संजय दिना पाटील यांनी घडलेल्या प्रकाराबाबत जाहीर माफी मागावी अशी आमची मागणी आहे. अन्यथा याविरोधात संजय दिना पाटील यांच्यासह पक्षाच्या कार्यक्रमांवर यापुढील काळात पत्रकार ठिकठिकाणी बहिष्कार टाकतील ही बाब लक्षात घ्यावी. पत्रकारांना आपले नेहमीच सहकार्य असते. पत्रकारांशी व्यवस्थित वागावे, बोलावे हे शिवसेनेनेत नव्याने दाखल झालेल्या खासदार संजय दीना पाटील यांना तुम्ही आपल्या पद्धतीने समजून सांगावे, अशी मागणी यावेळी करण्यात आली.

मुंबई प्रेस क्लबची भूमिका

दरम्यान, मुंबई प्रेस क्लबने देखील संजय दिना पाटलांचा तीव्र शब्दांत निषेध नोंदवला आहे. प्रेस क्लबनं काढलेल्या निषेधाच्या पत्रात म्हटलं की, "आपले व्यावसायिक कर्तव्य बजावत असलेल्या टेलिव्हिजन पत्रकारांना शिवसेना खासदार संजय दिना पाटील यांनी कथितरीत्या दिलेल्या धमक्यांचा आणि केलेल्या दमबाजीचा 'मुंबई प्रेस क्लब' तीव्र निषेध करतो.

वाजवी प्रश्न विचारल्याबद्दल पत्रकारांना शारीरिक हिंसाचाराची धमकी देणे हा प्रसारमाध्यमांच्या स्वातंत्र्यावर आणि निर्भयपणे व कोणत्याही दडपणाशिवाय वार्तांकन करण्याच्या अधिकाराचे रक्षण करणाऱ्या लोकशाही मूल्यांवर झालेला हल्ला आहे. विशेषतः विद्यमान खासदाराकडून होणारे असे वर्तन अस्वीकार्य असून ते लोकप्रतिनिधीच्या जबाबदाऱ्यांशी विसंगत आहे. खासदार संजय पाटील यांनी वापरलेली कथित अपमानास्पद भाषा आणि दिलेल्या धमक्यांचा 'मुंबई प्रेस क्लब' स्पष्ट शब्दांत निषेध करतो. आम्ही शिवसेनेच्या नेतृत्वाला आवाहन करतो की त्यांनी या गंभीर घटनेची त्वरित दखल घ्यावी, निवडून आलेल्या लोकप्रतिनिधीच्या जबाबदाऱ्यांबाबत त्यांना समज द्यावी आणि ज्या पत्रकारांना त्यांनी कथितरीत्या धमकावले, त्यांची त्यांनी बिनशर्त जाहीर माफी मागावी याची खात्री करावी.

तसंच, आम्ही मुंबई पोलिसांना विनंती करतो की त्यांनी या घटनेची योग्य दखल घ्यावी आणि पत्रकारांना कोणत्याही भीतीशिवाय किंवा हिंसाचाराच्या धोक्याशिवाय आपली व्यावसायिक कर्तव्ये पार पाडता येतील, याची खात्री करावी. मुक्त आणि स्वतंत्र प्रसारमाध्यमे हा कोणत्याही चैतन्यशील लोकशाहीचा आधारस्तंभ असतो. वाजवी प्रश्न विचारल्याबद्दल पत्रकारांना धमकावण्याचा, त्यांची दमबाजी करण्याचा किंवा त्यांना गप्प करण्याचा कोणताही प्रयत्न लोकशाहीतील उत्तरदायित्वाच्या मुळावर घाला घालणारा असतो आणि त्याचा स्पष्ट शब्दांत निषेध केलाच पाहिजे.