Mahayuti Politics : फडणवीसांच्या स्वबळाच्या नाऱ्याला अजितदादांचाही होकार; महायुतीतील दोन मोठे पक्ष 'एकला चलो'च्या भूमिकेत ?

Pune News : आगामी चार महिन्यांमध्ये स्थानिक स्वराज्य संस्थांच्या निवडणुका घ्या असा सूचना सुप्रीम कोर्टाने सरकारला दिल्या आहेत. त्यामुळे कार्यकर्त्यांमध्ये कुठेतरी उत्साह निर्माण झाला असतानाच महायुती आणि महाविकास आघाडी होणार का ? नाही या विचाराने कार्यकर्त्यांचा जीव भांड्यात पडला आहे. अशातच सुरुवातीला मुख्यमंत्री देवेंद्र फडणवीस यांनी काही ठिकाणी युती तर काही ठिकाणी स्वबळावर निवडणूक लढणार असल्याचे स्पष्ट केला आहे. त्यानंतर उपमुख्यमंत्री अजित पवार (Ajit Pawar) यांनी देखील यामध्ये होकार भरला आहे.

गेल्या चार वर्षांपासून स्थानिक स्वराज्य संस्थांच्या निवडणुका रखडल्या आहेत. त्यामुळे स्थानिक पातळीवर निवडणुका लढवण्याची इच्छा असणारा मोठ्या कार्यकर्त्यांचा वर्ग या निवडणुकांकडे डोळे लावून आहेत. सद्य परिस्थितीमध्ये महायुतीतील तिन्ही पक्षांमध्ये इच्छुकांची संख्या प्रचंड मोठ्या प्रमाणात आहे.

अशात जर महायुती झाली तर आपल्याला पक्षाचे तिकीट मिळण्याची शक्यता कमी असल्याने अनेक स्थानिक पातळीवरील पदाधिकारी, कार्यकर्ते आणि नेते मंडळी स्वबळावर निवडणूक लढवावी अशाच भूमिकेत आहेत. आता हीच भूमिका वरिष्ठ नेते मंडळींच्या तोंडातून देखील यायला लागले आहे. त्यामुळे स्थानिक स्वराज्य संस्थांच्या निवडणुकीत तरी बहुतांश ठिकाणी युतीच्या शक्यता धूसर असल्याचं चित्र सध्या पाहायला मिळत आहे.

मुख्यमंत्री देवेंद्र फडणवीस (Devendra Fadnavis) यांना याबाबत विचारला असता फडणवीस यांनी आम्हाला आगामी निवडणुका महायुती म्हणून लढायच्या आहेत असं स्पष्ट केलं. मात्र काही अपवादात्मक ठिकाणी स्वबळावर निवडणुका लढाव्या लागतील असं देखील फडणवीस यांनी सांगितलं.

स्थानिक स्वराज्य संस्थांची ही निवडणूक म्हणजे कार्यकर्त्यांची निवडणूक आहे. त्यामुळे ज्या ठिकाणी दोन्ही पक्षांमध्ये तुल्यबळ असे उमेदवार असतील त्या ठिकाणी आम्ही वेगळे लढू शकतो.मात्र अपवादात्मक परिस्थितीमध्ये वेगळं लढावं लागलं तरी एकमेकावर टीका न करता पॉझिटिव्ह प्रचार करून आम्ही निवडणुका लढवू. ज्या ठिकाणी स्वाभाविक युती होऊ शकते त्या ठिकाणी युती होईल. ज्या ठिकाणी युती होणे कठीण आहे. त्या ठिकाणी निवडणुकांच्या निकालानंतर एकत्र येऊ असं देवेंद्र फडणवीस म्हणाले.

उपमुख्यमंत्री अजित पवार म्हणाले, मुख्यमंत्री देवेंद्र फडणवीस हे महायुतीचे प्रमुख आहेत. त्यामुळे फडणवीस यांनी महापालिका निवडणुकीबाबतची भूमिका घेतली. त्याला माझं समर्थन असून माझी वेगळी भूमिका नाही. अजित पवार यांनी देखील काही अपवाद वगळता बहुतांश ठिकाणी स्थानिक स्वराज्य संस्थांच्या निवडणुकांमध्ये स्वबळावर निवडणूक लढवणार असल्याचे संकेत दिले आहेत.