Baramati By Election: लक्ष्मण हाके बारामती पोटनिवडणुकीसाठी मैदानात उतरणार? युगेंद्र पवारांचं मोठं वक्तव्य

Pune News : निवडणूक आयोगाकडून बारामती पोटनिवडणुकीचा कार्यक्रम जाहीर करण्यात आला आहे. हा निवडणूक कार्यक्रम जाहीर झाल्यानंतर बारामती मधून उपमुख्यमंत्री सुनेत्रा पवार या निवडणूक लढवतील, अशी शक्यता व्यक्त केली जात आहे.

राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी देखील त्यानंतर सुनेत्रा पवार यांच्या विरोधात महाविकास आघाडी उमेदवार देणार नसल्यास स्पष्ट केलं आहे. अशातच बारामतीमधील धनगर समाजाकडून ही निवडणूक बिनविरोध होऊ दिली जाणार नाही, अशी भूमिका घेण्यात आली आहे. यावर राष्ट्रवादी काँग्रेस ,शरदचंद्र पवार पक्षाचे नेते युगेंद्र पवार यांनी आपली भूमिका मांडली आहे.

बारामतीमधील मेडिकल कॉलेजला अजित पवारांचे नाव देण्याच्या मागणीला धनगर समाजाकडून विरोध केला जात आहे. त्यामुळे ही निवडणूक बिनविरोध होऊ दिली जाणार नाही अशी भूमिका समाजाकडून घेण्यात आली आहे. ओबीसी आंदोलन गाजवणारे लक्ष्मण हाके यांना या ठिकाणाहून मैदानात उतरवण्याची तयारी देखील असल्याच्या चर्चा सुरू आहेत.

बारामती पोटनिवडणुकी बाबत बोलताना युगेंद्र पवार म्हणाले, खासदार सुप्रिया सुळे यांनी पक्षाची भूमिका स्पष्ट केली असून महाविकास आघाडीतर्फे बारामतीमध्ये कोणताही उमेदवार दिला जाणार नाही. आणि ही निवडणूक बिनविरोध होईल यासाठी आम्ही प्रयत्न करणार आहोत. बारामतीकरांची देखील ही निवडणूक बिनविरोध हवी अशी इच्छा आहे. त्या दृष्टिकोनातून आम्ही सुनेत्रा पवार यांची साथ देऊन त्यांच्या माध्यमातून बारामतीचे प्रश्न सोडवण्याचे प्रयत्न करणार आहे.

धनगर समाजाने घेतलेल्या भूमिकेबाबत बोलताना युगेंद्र पवार म्हणाले, आयुर्वेदिक कॉलेज आणि रुग्णालय बारामतीत आणण्यात दादांचा मोठा वाटा आहे. त्यामुळे त्यांचं नाव त्या वस्तूला देण्याबाबतचा निर्णय होत आहे. अजितदादांसह पवार कुटुंबातील कोणत्याही व्यक्तीने जातीपातीचे राजकारण कधीच केलं नाही.

दादांनी बारामती तालुक्यासाठी खूप काही केला आहे. त्यांचे उपकार या तालुक्यावर आहेत. त्यामुळे आम्ही सर्वांशी चर्चा करणार आहोत त्यांना श्रद्धांजली म्हणून ही निवडणूक बिनविरोध व्हावी यासाठी प्रयत्न करणार आहोत.

लक्ष्मण हाके यांचं नाव बारामती विधानसभा निवडणुकीसाठी चर्चेत आहे. याबाबत बोलताना युगेंद्र पवार म्हणाले, एका सशक्त लोकशाहीमध्ये कोणालाही निवडणूक लढण्याचा अधिकार आहे. कुणीही कुठेही जाऊन निवडणूक लढू शकतं त्यामुळे त्यांची इच्छा असेल तर ते ही निवडणूक लढू शकतात असं युगेंद्र पवार म्हणाले.