Fadnavis on Bhujbal : भुजबळांना मंत्रिमंडळात न घेण्यामागे अजितदादांचा काय प्लॅन होता?; खुद्द फडणवीसांनी सांगितला

Pune, 23 December : ज्येष्ठ नेते छगन भुजबळ यांना राज्याच्या मंत्रिमंडळातून डावलण्याचा उपमुख्यमंत्री अजित पवार यांचा कोणताही हेतू नव्हता. राष्ट्रवादी काँग्रेस पक्षाचा विस्तार राष्ट्रीय पातळीवर करण्याची अजितदादांची इच्छा आहे, त्यासाठी इतर राज्यांतही मान्यता असलेल्या छगन भुजबळ यांच्यासारख्या नेत्याच्या खांद्यावर राष्ट्रवादी काँग्रेसची राष्ट्रीय पातळीवरील जबाबदारी द्यायची होती, हे मला खुद्द अजित पवारांनी सांगितले होते, असे सांगून मुख्यमंत्री देवेंद्र फडणवीस यांनी भुजबळांच्या नाराजीमागचे कारण स्पष्ट केले.

मुख्यमंत्री देवेंद्र फडणवीस (Devendra Fadnavis) यांनी पुण्यात माध्यमांशी बोलताना हे विधान केले आहे. अजितदादांनी मला सांगितले होते, की आमचा राष्ट्रवादी काँग्रेस पक्ष राष्ट्रीय स्तरावर राहिलेला आहे. तो आम्हाला राष्ट्रीय पातळीवर मोठा करायचा आहे, अशी आमची इच्छा आहे. राष्ट्रीय पातळीवर पक्ष वाढविताना छगन भुजबळ यांच्यासारखा नेता ज्यांना देशातील इतर राज्यांतही मान्यता आहे. त्यांना आम्हाला राष्ट्रीय पातळीवर पाठवायचे आहे. पण, भुजबळांचे मत जरा वेगळं होतं. त्यामुळे हा प्रश्न निर्माण झालेला आहे, असे फडणवीस यांनी नमूद केले.

छगन भुजबळ (Chhagan Bhujbal) यांच्या नाराजीवर आम्ही सर्वजण मिळून निश्चितपणे तोडगा काढू. छगन भुजबळ यांच्यासारखा एक नेता आमच्यासोबत मैदानात असला पाहिजे, या दृष्टीने या नाराजीनाट्यातून निश्चितपणे मार्ग काढला जाईल, असेही फडणवीस यांनी सांगितले.

छगन भुजबळ यांना भारतीय जनता पक्षात प्रवेश देणार का, यावर देवेंद्र फडणवीस म्हणाले की, छगन भुजबळ यांनी तशी इच्छाही व्यक्त केलेली नाही. भुजबळ यांच्या भाजप प्रवेशाचा कोणताही विषय पुढे आलेला नाही. शेवटी राष्ट्रवादी काँग्रेस, शिवसेना आणि भारतीय जनता पक्ष आम्ही एकत्रित आहोत ना. त्यामुळे भुजबळांनी आमच्या पक्षात प्रवेश करावा, अशी आमची भावनाही नाही.

राष्ट्रवादी काँग्रेस, भारतीय जनता पक्ष आणि शिवसेना हे तीनही पक्ष एकत्रित आहोत. आम्हाला एकत्रित निर्णय करायचे आहेत. ज्येष्ठ नेते छगन भुजबळ यांच्याबद्दल महायुतीमधील तीनही पक्षांमध्ये आदराची भावना आहे, त्यामुळे भुजबळांची नाराजी दूर करण्यात येईल, असेही फडणवीस यांनी स्पष्ट केले.