Unity of ShivSena : दोन्ही शिवसेना एकत्र येणार? आनंदराव आडसूळांनी सांगितली ‘अंदर की बात’

Amravati, 03 February : राज्याचे सामाजिक न्यायमंत्री संजय शिरसाट यांनी दोन दिवसांपूर्वी दोन्ही शिवसेनेने एकत्र येण्याची हीच ती योग्य वेळ आहे. त्यासाठी मला संधी मिळाली तर मी प्रयत्न करेन, असे विधान केले होते. त्याबाबत शिवसेनेचे ज्येष्ठ नेते, माजी खासदार आनंदराव आडसूळ यांनी मात्र वेगळी भूमिका मांडली आहे. मला सगळ्या गोष्टी माहिती आहेत, ते तेवढं सोपं नसतं, असे विधान केले आहे, त्यामुळे शिंदेंच्या शिवसेनेत सध्या काय चाललंय असा प्रश्न निर्माण होत आहे.

दोन्ही शिवसेनेच्या एकत्र येण्याबाबतचा विषय फार जुना आहे. या विषयाला आता नव्याने वाचा फोडणे सोपे नाही. मंत्री संजय शिरसाट (Sanjay Shirsat) यांना काय वाटलं? का वाटलं? याबाबत त्यांच्याशीच बोललं पाहिजे. त्यांच्या मनात नेमकं काय आहे, हे मी काय सांगणार, मी थोडाच मनकवडा आहे का, असा सवाल अनुसूचित जाती जमाती आयोगाचे अध्यक्ष आनंदराव आडसूळ यांनी उपस्थित केला.

आनंदराव आडसूळ (Anandrao Aadsul) म्हणाले की, मी शिवसेनेचा ज्येष्ठ नेता आहे आणि मला शिवसेनेतील सगळ्या काही गोष्टी माहिती आहेत, त्यामुळे ते तेवढं सोपं नसतं. पण दोन्ही शिवसेना खरंच एकत्र आल्या तर आम्हाला आनंदच होणार आहे. दोन्ही शिवसेना एकत्र येणे, ही चांगली गोष्ट आहे. त्याबाबत कुणाच्याही मनात शंका नाही

आमच्या शिवसेना पक्षात कसल्याही प्रकारची खदखद वगैरे काही नाही. तुम्ही ती नसलेली खदखद दाखवता, असेही माजी खासदार आनंदराव आडसूळ यांनी स्पष्ट केले. शिंदे गटातील नेते हे परस्पर विरोधी विधाने करत आहेत, त्यामुळे शिवसेनेतही मतभेद निर्माण झाल्याचे दिसून येत आहे.

काय म्हणाले होते संजय शिरसाट?

शिवसेनेचे दोन गट पडले, याचं दुख: आहे. दोन्ही शिवसेना एकत्र येण्यासाठी दोन्ही बाजूने प्रयत्न झाले पाहिजेत. शिवसेना एकत्र यायला हवी, असे दोन्ही पक्षाचे कार्यकर्ते आणि पदाधिकाऱ्यांना वाटते आहे. दोन्ही पक्षातील ज्येष्ठ नेत्यांनी पुढाकार घ्यायला हवा, दोन्ही नेत्यांनी आता एकत्र येण्याची वेळी आली आहे. मला तशी संधी मिळाली, तर पुढाकर घेईन, असेही संजय शिरसाट यांनी म्हटले होते.